Aldymen aýdan ortalyǵy Aqmoldyń irgesindegi qyrmanǵa at basyn tiregen jýrnalıster qyzyl bıdaıdy ushyryp, keptirip, taza bıdaıdy kólikke artyp jóneltip jatqan jumysshylardyń qyzý jumysyna kýá boldy.
– Tamyzdyń basynan bastap qyrmannyń astyq tógetin alańdaryn bútindep, ázirlep qoıǵanbyz. Bıdaıdyń sapasy jaqsy, jumys jospar boıynsha júrip jatyr, – dedi qyrman basshysy.
Bıyl aýdan boıynsha 202 myń gektardan astam alqapqa bıdaı, basqa da dándi daqyldar, maıly daqyl túrleri egilgen. 289 gektarǵa kartop, taǵy 185 gektarǵa basqa da kókónis túrleri egilipti.
Jýrnalıstermen egistik basynda júzdesken Selınograd aýdanynyń ákimi Malǵajdar Tátkeev:
– Tamyz aıynyń sońynda jańbyr jaýyp ketip, egin orýdy 10-12 kúnge toqtatýǵa týra keldi. Degenmen qazir aýa raıy jaqsy, jumys qarqyndy júrip jatyr. Bitik eginniń qulaýy, dalada bosqa shashylyp qalýy sııaqty oqıǵa bolǵan joq. Osy qarqyndy saqtasaq, 19-20 kún ishinde oraq naýqanyn aıaqtaımyz, – dedi.
Janar-jaǵarmaı máselesi boıynsha da qolbaılaý bolarlyq másele týyndamapty. Kúzgi dala jumystaryna arnalǵan 3900 tonna dızel otyny bekitilgen baǵamen bólinip, ýaqtyly jetkizilgen.
Qazir Selınograd aýdany boıynsha 543 kombaın alqaptan kún saıyn 10 500 gektardyń eginin orady eken. Odan bólek 126 traktor men 116 avtokólik te tynymsyz jumysqa jegilgen.
Aýyl sharýashylyǵy mınıstrligi bıyl respýblıka boıynsha 20 mıllıon tonna shamasynda bıdaı jınaýdy mejelep otyrǵanyn aıta keteıik. Onyń 9 mıllıon tonnasyn eksporttaý josparlanǵan. Orylǵan bıdaıdy saqtaıtyn qambalardyń jalpy syıymdylyǵy 26,7 mıllıon tonnany quraıdy.
Arnur ASQAR,
«Egemen Qazaqstan»
