Mekteptegi dástúrli ata-analar jınalysy kóptegen máselelerdi sheshýge kómektesetini anyq. Alaıda synyp jetekshileriniń aıtýynsha, ata-analarmen qarym-qatynas ornatýdyń bul túrinde birqatar qıyndyqtar týyndaıdy. Eń basty sebebi, pedagogterge júkteletin jumystyń shamadan tys bolýy jáne jınalysty ótkizý ádisiniń eskirýi. Saıyp kelgende, bul ata-analardyń mekteppen qarym-qatynas ornatýyna áser etedi. «Biryńǵaı respýblıkalyq ata-analar konferensııasynyń» dástúrli ata-analar jınalysynan ereksheligi, bul jas urpaqty ınnovasııalyq bilimmen jáne otbasylyq tárbıeleý ádisterimen oqytýǵa baǵyttalǵan jáne túrli taqyryptardy qamtıtyn jańa format. Osyǵan oraı ata-analar konferensııasyn elimizdiń barlyq mektebinde ótkizý josparlanǵan. Kezdesý barysynda ár synyptyń ata-analaryna arnalǵan túrli taqyryp qozǵalady. Atalǵan konferensııanyń alǵashqy jıyny ótken apta sońynda barlyq mektepte ótti. Elordadaǵy №54 mektep-lıseıiniń qabyrǵasynda uıymdastyrylǵan mańyzdy máslıhatqa Bilim jáne ǵylym vıse-mınıstri Ashat Aımaǵambetov qatysyp, bul konferensııanyń ustaz, ata-ana, oqýshy úshin qanshalyqty qajet ekenin tilge tıek etti.
«Bıyl 1 qyrkúıek kúni elimizdiń 7024 mektebine 3 mıllıonnan astam oqýshy kelse, olardyń 350 myńnan astamy 1 synypqa barǵandar. Mektep tabaldyryǵyn endi attaǵan búldirshinderimizdiń sany jyl saıyn artyp kele jatqany bizdi qýantady. Mektepke alǵash barǵan balalardyń ata-analarymen tyǵyz baılanysta bolyp, osyndaı konferensııalardy ótkizý mektep pen ata-ana arasyndaǵy qarym-qatynasty odan ári arttyrady. Mamandarymyz túrli taqyrypta oı qozǵaıtyn bolady. Mysaly, balanyń aqparattyq qaýipsizdigin qamtamasyz etý taqyryby. Bul – ózekti. Qazirgi tańda búldirshinder balabaqsha jasynda bolsa da planshet, smartfondardan alýan túrli aqparat alady. Sondyqtan bala qandaı aqparat alyp jatqanyn qatań qadaǵalaý kerek. Elbasynyń «Bolashaqqa baǵdar: rýhanı jańǵyrý» baǵdarlamasynda bilim-tárbıe salasyna qatysty mańyzdy máseleler kóterildi. Sonymen qatar bilim salasyndaǵy jańa baǵdarlamalar týraly ártúrli aqparat taralýda. Bul baǵdarlamalardyń barlyǵyn saraptaýdan, saralaýdan ótkizip, 2000 jyldardan beri júrgizip kelemiz. Sebebi bizge fýnksıonaldyq saýattylyq kerek. О́ıtkeni búginde aqparat jyldam jańarýda. Sondyqtan telefondardaǵy, basqa da qurylǵylardaǵy aqparatty jattaǵannan góri ony qalaı paıdalanamyz degen suraqtyń jaýabyn qarastyrý qajet. Taǵy bir másele – ustaz mártebesi. Ustaz mártebesi tek memleket sheshetin másele emes. Oǵan ata-analardyń da qosatyn úlesi qomaqty. Nege? Sebebi dastarqan basynda mekteptegi muǵalim týraly jaǵymsyz pikir aıtatyn bolsańyz, ony balańyz da tyńdap otyrýy múmkin. Odan keıin ustazdyń mártebesi qalaı kóteriledi? Kóp máseleler otbasyna baılanysty. Osy másele boıynsha da, ustazdardyń jalaqysyn kóterýge baılanysty da kóptegen jumys atqarýdamyz», dedi A.Aımaǵambetov.
Atalǵan oqý ordasynyń basshysy Shákárim Tolybaıuly bul sharanyń negizgi maqsaty – mektep ákimshiligi, muǵalimder jáne ata-analar qaýymdastyǵynyń arasyndaǵy birlik, osy birliktiń arqasynda mektepke jańadan qadam basqan oqýshylarǵa pedagogıkalyq, psıhologııalyq keńes berý ekenin jetkizdi. Sondaı-aq konferensııa barysynda «Balanyń aqparattyq qaýipsizdigin qamtamasyz etý», «Balada ınternet-táýeldilik qalyptasýynyń aldyn alý», «Mektep ortasyna destrýktıvti dinı aǵymdar engizýdiń aldyn alý», «Otbasylyq qundylyqtardy nyǵaıtý», «Balaǵa mektepke oqýǵa beıimdelýge tıimdi kómek sharalary týraly», «Neıro-psıhofızıologterdiń bolashaq birinshi synyp oqýshylary – uldar men qyzdardyń ata-analaryna arnalǵan ustanymdary», «Balanyń ózin-ózi baǵalaýyn arttyrýǵa yqpal etińiz» sııaqty mańyzdy taqyryptar mańaıynda mamandardyń pikiri aıtyldy.
Shara aıaqtalǵan soń balasy 1 synypqa barǵan ata-analardyń biri Marjan Nurshaıyhqyzyn áńgimege tartqan edik.
«Mende balamdy mektepke bermeı turyp bilim salasy, mektep jaıly jaǵymsyz pikir basym boldy. Sebebi áriptesterimnen mektep júıesine kóńilderi tolmaıtynyn kóp estigen edim. Osy konferensııaǵa shaqyrǵan kezde qatardaǵy bir jınalys shyǵar dep oılaǵan edim. Biraq alýan túrli aqparattar, mańyzdy pikirler oıymdy túgeldeı ózgertti. О́ıtkeni jıynnan kóp áser aldym. Eń birinshi, uıymdastyrýshylar búgingi mańyzdy másele, ıaǵnı balalardyń aqparat alýyn, ony paıdalaný jaıyn durys tańdaǵan. Vıse-mınıstr atap ótkendeı, biz barlyq mindetti tek mektepke nemese muǵalimderge artyp qoıyp otyrmaýymyz kerek. Nege deseńiz, balanyń qalyptasýyna ata-ana da áser etedi. Osyny eskere otyryp, ata-analar qaýymy jumysy qaýyrt bolsa da, balasyna nazar aýdaryp, qandaı aqparat alyp jatqanynan habardar bolýy kerek. Spıkerlerdiń bilim men tárbıeni qatar alyp júrý kerek degen pikiri qundy jáne bolashaǵymyz úshin mańyzdy», deıdi ol.
Raýan QAIDAR,
«Egemen Qazaqstan»
