О́tken shilde aıynda Kóktuma aýylyndaǵy «Samal» pansıonatynda demalysta bolyp qaıttyq. Pansıonat ıesi Soıýzhan Nóserhanqyzy balalarymen demalýshylarǵa barlyq jaǵdaı jasap otyr. Úsh mezgil dámdi ystyq tamaqpen qamtamasyz etedi. Azyq-túlikti ózderi ár jerden ákeledi. Negizinen ájeptáýir alys Úsharal qalasynan tasıdy. Demalatyn jerde tolyq jabdyqtalǵan bólmeler. Balalar alańy. Keshke bı ótkizetin oryn. Tabıǵı shóppen qaptalyp, aýasy árýaqytta taza jazǵy ashana. Demalýshylardyń sany júz adamǵa jetetin ýaqyttary da bolatyn kórinedi. Kelýshilerdiń kópshiligi almatylyqtar. Olardyń birazymen sóıleskenimde pansıonat ıesine rıza ekendikterin bildirdi.
Ekinshi bir pansıonat ıesi Álim. Onyń meken etken jeri kóldiń jıegi. Bul mekende birneshe kólde serýendeıtin motorly kishigirim júzý tehnıkalary bar. Taýda sharýashylyǵy bar eken. Biraz mal ónimderin sodan qamtamasyz etip otyratyn kórinedi. Bul ónimder eshqandaı hımııalyq qospasyz ekologııalyq taza. Osy bir jarym myńdaı halqy bar Kóktuma aýylynyń birazynda ártúrli kólemdegi pansıonattardyń baryn baıqadym. Onymen qosa iri qalalardyń qaltaly azamattary úlken záýlim ǵımarattar salyp, pansıonattar ashyp jatqan kórinedi. Solardyń bireýi almatylyq azamat Marat degen kásipkermen áńgimeleskenimde, ol kisi munyń ózi úshin, demalýǵa kelýshilerge de, onymen qosa úkimetke de paıdaly ekendigin baıandady.
Osylardyń bárin saraptap qortyndylaǵanda, áli de kóldiń jaǵalaýy tolyq ıgerilip, jabdyqtalmaǵan. Osy eldi mekennen on bes shaqyrymdaı jerdegi Aqshı eldi mekeni jaqsy ıgerilip jatqan kórinedi. Jergilikti turǵyndardyń aıtýynsha, Kóktuma óńiriniń Aqshıden keıbir artyqshylyqtary bar eken. Bul el turǵyndarynyń suraıtyny – joldy jaqsartý. Azyq-túlik alatyn jerlerdi jaqyndatý. Kóldiń jıegin abattandyrý. Meniń ózimniń kózimmen kórgenim kóldiń keıbir jaǵalary tik jar, tipti bıiktigi jeti-segiz metrge jetedi. Opyrylyp qulap jatyr jáne baıqamasań tik jardan qulap ketý qaýipi bar. Árıne, Alakóldiń keleshekte jaqsy demalys ornyna aınalatynyna kámil senimiz. Áıtse de kóldiń keıbir jerlerine erekshe kóńil bólinip, keıbir jerleri umyt qalǵan sııaqty. Osy olqylyqtyń ornyn toltyrýǵa barlyq jaǵdaı jasalsa, elimizde týrızmdi damytýǵa qosylǵan úles bolar edi.
Erkin DÁÝEShULY,
Qazaqstan Jýrnalıster odaǵynyń múshesi
