Qazaq músin ónerinde óshpes iz qaldyrǵan qylqalam sheberiniń ómir joly men shyǵarmashylyǵyn nasıhattaýdy maqsat etken kórmege músinshiniń ár jyldary jasaǵan «Tomırıs», «Tuńǵysh», «Salt atty», «Kezdesý», «Bı», «Búrkitshi» syndy 16 músini, qyzy Sándi Ábishevanyń keskindemelik týyndylary qoıylǵan.
Baqytjan Ábishevtiń esimi elimizdegi kóptegen eskertkishterdiń avtory retinde belgili. Astanada Atatúrikke, Álııa Moldaǵulovaǵa, Jaıaý Musaǵa arnalǵan eskertkishteri ornalasqan. Toqash Bokın, Jambyl Jabaev, Kenen Ázirbaev, Ádı Sháripovterdiń eskertkishteri Almatyǵa kórik berip tur. Atyraýdyń ortalyq alańyndaǵy Isataı men Mahambet eskertkishi de músinshiniń dara qoltańbasyn aıqyndaıdy.
Kórmeniń ashylý saltanatyna qatysqan músinshiniń zaıyby, Qazaqstan Respýblıkasynyń eńbek sińgen ártisi Shámshágúl Meńdııarova: «Baqytjan jumys istegende syrtqy formasyna ǵana mán berip qoımaıdy, ár keıipkeriniń jan-dúnıesine tereń úńile biledi. Aqyl, júrek jáne qol – osy úsheýi birikkende ǵana qundy dúnıe shyǵady deıtin. Ásirese júırik tulpardy jaqsy kórdi, sondyqtan bolsa kerek, onyń týyndylarynyń qatarynda jylqy beınesi kóp kezdesedi», deıdi.
Baqytgúl BABASh,
«Egemen Qazaqstan»
ATYRAÝ
