– Uzaq jyldardan beri menimen birge jumys istep kele jatqan Ádilbek Ryskeldiulyn jaqsy bilesizder. Ol elordanyń alǵashqy ákimi boldy, barlyq laýazymdy qyzmetterde jaýapkershilikpen ári adal eńbek etti. Oǵan zor densaýlyq pen tabys tileımin, – dedi Qazaqstan Prezıdenti.
Nursultan Nazarbaev jıynǵa qatysýshylarǵa Prezıdent Ákimshiliginiń jańa Basshysy Áset Isekeshevti tanystyrdy.
– Áset О́rentaıuly meniń kómekshim boldy, mınıstr, Premer-Mınıstrdiń orynbasary qyzmetterin atqardy. Ol bas qalamyzda jumys istegen sońǵy eki jarym jyl ishinde elordalyqtardyń joǵary baǵasyna ıe boldy. Ol belsendi ári kreatıvti ustanymmen erekshelenedi. Qazir bizge dál osyndaı adam kerek. Isekeshev elordaǵa ákim bolǵan ýaqytta biz «EKSPO-2017» kórmesin jáne Astananyń 20 jyldyǵyn abyroımen ótkizdik. Áset О́rentaıuly bul mindetti de laıyqty oryndaı alatynyna senimdimin, – dedi Memleket basshysy.
Elbasy jıyn sońynda elimizdiń ekonomıkalyq ósimin jáne halyqtyń ál-aýqatyn odan ári arttyrý isinde Prezıdent Ákimshiliginiń basty ról atqaratynyn atap ótip, onyń aldaǵy kezeńge arnalǵan jumystarynyń negizgi basymdyqtaryn belgilep berdi.
– Apparattyń aldynda buǵan deıin qabyldanǵan memlekettik baǵdarlamalardyń júzege asyrylýyn jáne oryndalýyn qamtamasyz etý jónindegi mańyzdy mindet tur. Búginde jumys aýqymy óńirlik deńgeıge aýysqanyn erekshe atap ótkim keledi jáne barlyq deńgeıdegi ákimderdiń qyzmetin úılestirý, olardyń ózara yqpaldasa eńbek etýine kómektesý qajet, – dedi Nursultan Nazarbaev.
