Boks • 13 Qyrkúıek, 2018

GGG & «Kanelo» aıqasatyn kún jaqyn

125 retkórsetildi

Bul kúnderi tórtkúl dúnıe jankúıerleri 15 qyrkúıekte AQSh-tyń Las-Vegas qalasyndaǵy «Tı-Mobaıl Arenada» orta sal­maqta judyryqtasyp júrgen Qa­zaqstannyń áıgili kásipqoı boks­shysy Gennadıı Golovkın men Meksıkanyń maqtanyshy Saýl Alvares arasyndaǵy jekpe-jekti taǵatsyzdana kútýde.  

Qos boksshy arasynda osydan bir jyl buryn ótken básekede teń esep tirkelgen bolatyn. Sol kezde bul nátıje eki tarapty da qanaǵattandyrmaǵan edi. Mine, endi qos sańlaq qaıta kúsh synasqaly otyr. Bul bıylǵy jyldyń basty jekpe-jegi dep aıtýǵa tolyq negiz bar. О́ıtkeni jankúıerler tarapynan Golovkın men Alvarestiń jekpe-jegine degen qyzyǵýshylyq keremet. Bıletter de kúni buryn satylyp qoıǵan kórinedi. Jer-jahannyń ár qıyryndaǵy san mıllıon kórermen sol keshte barlyq sharýalaryn ysyryp qoıyp, alpaýyttar aıqasyn tamashalaýǵa beldi bekem býyp otyr. Barsha Meksıkanyń turǵyndary «Kanelonyń» jeńiske jetýin tilese, kúlli Qazaqstan halqy GGG-niń utqanyn qalaıdy. 

Qarymta kezdesý ótetin kún belgilengen sátten aqparat maıdany bastaldy da ketti. Ásirese Saýl Alverstiń jaqtastary bul iste erekshe belsendilik tanytyp, BAQ ókilderine bergen suhbattarynda olar jerlesimizdi «jerden alyp, jerge saldy». Promoýterleri men menedjerlerinen bastap, bapkerlerine deıin aýyzdaryna kelgenderin aıtty. «Kanelonyń» ózi de kóp sóıletin jigit eken: «О́tkende de men jeńgen edim. Biraq tóreshiler báseke teń aıaqtaldy degen ýáj aıtty. Qazylar osyndaı sheshimge kelse, meniń kelispeýge quqym joq. Al bul joly bári basqasha bolady. Men Golovkındi uryp jyǵamyn», dep kópire sóıledi. 

Genanyń kóp sózge joq ekenin barsha jurt jaqsy biledi. Ol – istiń adamy. Osylaı kópire sóılep, ses kórsetpek bolǵan jigitterdiń kóbi jerlesimizdiń aýyr soqqylarynan keıin es jııa almaı, edende etpetinen jatty. Ony kózimiz kórdi. Kezdesý aıaqtalǵannan keıin olardyń deni: «Golovkınniń dúleı kúsh ıesi ekenin burynnan biletinbiz. Ony jekpe-jekte jeńe almaıtynymyz da anyq. Tek óz-ózimizge jarnama jasaý úshin osyndaı qadamǵa bardyq», dep aqtalǵandaı boldy. 

Qazaqstandyq boksshynyń ózi: «Árkimniń óz pikiri bar. Saýl ne dese de maǵan báribir. Al óz basym kóp sóılegendi asa unatpaımyn. Kimniń kim ekenin rıng kórsetedi. Sondyqtan da 15 qyrkúıekti kúteıik. Sol kúni barlyq suraqqa naqty jaýap alasyzdar», dep telefon arqyly tildeskenimizde áńgimeni qysqa qaıyrdy. 

Sonymen, aldaǵy kúnderi barsha jankúıer nazary Las-Vegasqa aýatyny daýsyz. Bul jekpe-jekte WBA, WBC jáne IBO nusqalary boıynsha álem chempıony ataǵy sarapqa salynady. Al eń bastysy, «Orta salmaq dárejesindegi teńdessiz boksshy kim: Gennadıı Golovkın be, álde Saýl Alvares pe?» degen saýaldyń naqty jaýabyn biletin bolamyz.

Ǵalym Súleımen,

«Egemen Qazaqstan»

Sońǵy jańalyqtar

Kitaphana kóbeıgen elde qylmys azaıady

Ádebıet • Búgin, 15:14

Zańsyz qarý-jaraq satqandar sottaldy

Qoǵam • Búgin, 12:50

Igerilgen ınvestısııanyń ıgiligi

Aımaqtar • Búgin, 12:37

Abaıdyń dombyrasy qandaı bolǵan?

Abaı • Búgin, 11:09

Uqsas jańalyqtar