Kásipkerlerge arnalǵan «Bastaý» jobasynyń da maqsaty osy. Memleket oqytady, kásip bastaýǵa qajet qarajatty beredi, tek múmkindikti tıimdi paıdalanýyńyz kerek. Mysaly, Atyraý oblysy boıynsha «Bastaý» jobasyna 663 adam qatysyp, kásipkerlik negizderin meńgergen, alaıda sonyń 64-i ǵana jeńildetilgen nesıege qol jetkizdi. «Bul – óte tómen kórsetkish, – deıdi «Atameken» Ulttyq kásipkerler palatasynyń ókili Baýyrjan Orazǵalıev. – «Bastaý» jobasynyń óńir úshin mańyzy zor. Jumystan bosaǵan azamattardy ekonomıkanyń basqa salalaryndaǵy jobalarǵa tartyp, bızneske oqytýǵa bolady. Iаǵnı muny áleýmettik joba retinde qarastyrý kerek. Oqytý men qarjylandyrýdy kózdeıtin memlekettik baǵdarlama qazirgi tańda Atyraýda tolyq iske aspaı tur. Sondyqtan oblystyq kásipkerler palatasyna jergilikti atqarýshy organdardyń belsendi qatysýymen halyq arasynda túsindirý jumystaryn jandandyrý qajet».
Al oblystyq kásipkerler palatasynyń basshysy Abdolla Idrısov bıyl jospar boıynsha 1325 adamdy oqytý qarastyrylǵanyn, búginge deıin meje 50 prosentke ǵana oryndalǵanyn aıtady. 22 bıznes-joba qarjylandyrylýǵa jiberilgen, 43 joba qaralymda jatyr.
Palata tarapynan júrgizilgen taldaý jumystary qarjy alý kezinde ekinshi deńgeıli banktermen arada problema týyndaıtynyn anyqtaǵan. Atyraý, Qulsary qalalarynyń turǵyndary qarjylandyrýdy «Damý» qory arqyly jergilikti «Sberbank» AQ fılıalynan ala alady. Biraq kepilzattyń bolmaýy nemese talaptarǵa saı kelmeýi, qosymsha kepildiń qajettiligi, ótinimderdi uzaq qaraý sekildi máseleler kásipkerlerdiń bastamalaryna kedergi keltirip tur. Osy túıindi tustar tarqatylsa, «Bastaýǵa» qyzyǵatyn kásipkerler qatary da kóbeıer edi.
Baqytgúl BABASh,
«Egemen Qazaqstan»
ATYRAÝ
