Atap aıtqanda, birqatar elder tólqujattyq-vızalyq baqylaýdan ótkizýdi jáne jeke tulǵany rastaý úlgilerin jetildirip, búginde bıometrııalyq málimetteri bar qujattar (sıfrly fotosýretter, saýsaq tańbasy, kóz sharasynyń keskindemesi jáne t.b) berýge kóshe bastady.
Oǵan qosa 16 jasqa deıingi balalardan da jeke tólqujat talap etetin memleketterdiń de qatary kóbeıip keledi. Máselen, Shengen aýmaǵyndaǵy eýropalyq memleketter, AQSh, BAÁ jáne basqa da memleketter qaýipsizdik sharalaryn alǵa tartyp, sheteldikterdi óz aýmaǵyna kirgizý tártibine osy talapty engizgen.
Osyǵan oraı, Ishki ister mınıstrligi de Qazaqstan azamattarynyń basqa elderdiń shekarasynan erkin ótýin qamtamasyz etý úshin qazirgi qoldanystaǵy qujattandyrý tártibin ózgertýge nıetti.
Naqtyraq aıtqanda, mınıstrlik «Jeke basty kýálandyratyn qujattar týraly» Zańǵa ózgertýler men tolyqtyrýlar engizý arqyly 16 jasqa deıingi balalar shetelge shyǵatyn jaǵdaıda tólqujat alýdy mindetteýdi qup kórip otyr. Al qazirgi ýaqytta shetelge saparlaǵan balalardyń fotosýretteri ata-analarynyń tólqujattaryna japsyrylýda.
Ishki ister mınıstrliginiń baspasóz qyzmeti taratqan málimetterge súıensek, shetelge shyǵatyn balalardyń jeke tólqujat alýyn mindetteıtin tártip 2019 jyldyń 1 qańtarynan bastap kúshine enýi múmkin.
Aıta keterligi, bıyldan bastap Qazaqstan tólqujatyn rásimdeý quny 2017 jylmen salystyrǵanda eki esege qymbattap 8 AEK (19240 teńge, 1 AEK – 2405) qurady. Al tólqujatty bir kún ishinde rásimdep, qol jetkizýge bolady.
Serik ÁBDIBEK,
«Egemen Qazaqstan»
