Mınıstrdiń aıtýynsha, elimizde jyl basynan beri qylmys deńgeıi 8 prosentke tómendegen. Alaıda ishimdikke salynýshylyq, nashaqorlyq, jumysy nemese oqýy joqtyq jáne otbasylyq kıkiljińder eldegi qylmystyq ahýalǵa teris áserin tıgizýde. Al eldegi jalpy qylmystyń 70 paıyzy urlyqtyń úlesinde.
Ishki ister mınıstrligi jyl basynan beri avtokólikti mas kúıinde júrgizgen 18 myńdaı adamnyń ustalǵanyna da toqtaldy. Shamamen 26 myńdaı adam júrgizýshilik quqynan aıyrylǵan. Al 2200 júrgizýshi ákimshilik qamaýǵa alynǵan.
Q.Qasymov osyǵan oraı, is júrgizý úderisinde zamanaýı tehnologııalardyń engizilip jatqanyn aıtty.
– Ákimshilik is júrgizýdi elektrondy júıege aýystyrýdamyz. Polısııa qyzmetkerleri planshetter arqyly IIM derekter qoryna enip, júrgizýshiler men olardyń kólikteriniń buryn-sońdy jasalǵan quqyq buzýshylyqtarǵa qatysy bar-joǵyn sol mezette anyqtaı alady. Bizdiń tarapymyzdan joldaǵy tártipti qadaǵalaý kúsheıtilip, ákimshilik sharalar qatańdatylsa da jol qozǵalysyna qatysýshylardyń tártipteri syn kótermeıdi, – dedi Ishki ister mınıstri.
Qalmuhanbet Qasymov, sondaı-aq jergilikti atqarýshy organdardyń kómegimen qala kóshelerinde, halyq kóp jınalatyn oryndarda beınebaqylaý júıesiniń kóptep ornatylyp jatqandyǵyn atap ótti. Máselen, «Qaýipsiz aýla» baǵdarlamasy boıynsha Astana, Almaty qalalary men oblys ortalyqtaryndaǵy 15 myń turǵyn úıdiń aýlasyna beınekameralar ornatylǵan.
Mınıstr buqaralyq aqparat quraldary men áleýmettik jelilerde ishki ister júıesine qatysty syn-eskertpelerge kóńil bólip otyratyndyǵyn da jetkizdi. Oǵan qosa polısııa qyzmetkerleriniń áreketteri nemese áreketsizdikteri boıynsha jaýapkershilik arta túskendigin aıtty. Máselen, bıyldyń ózinde ishki ister bólimderiniń 600 qyzmetkeri teris qylyqtary úshin qyzmetten qýylǵan.
Al jyl basynan beri Ishki ister mınıstrliginiń 4 qyzmetkeri qyzmettik boryshyn óteý kezinde qaza taýyp, 84 qyzmetker jaralanǵan.
Baspasóz máslıhatynda Ishki ister mınıstri salany reformalaý jáne qoǵam nazaryn aýdarǵan qylmystar boıynsha qoıylǵan saýaldarǵa da jaýap berdi. Onyń aıtýynsha, jumys ýaqytynyń tıimdi paıdalanylýy, artyq esep berýlerden aryltý, artyq otyrystar men ózine tán emes qyzmetterden bosatý arqyly polısııa qyzmetkerleriniń 10 prosentin qysqartyp, únemdelgen qarajat esebinen halyqpen tikeleı jumys isteıtin jol-patrýldik polısııasy qyzmetkerleriniń aılyǵyn 50 prosentke kóterý josparlanǵan.
Ishki ister mınıstri ishki ister bólimderiniń zamanaýı ǵımaratqa, qyzmetkerleriniń baspanaǵa muqtaj ekendigin aıtyp ótti.
Mınıstrdiń baıandaýynsha, 2018 jyldyń 8 aıynda 102 qyzmetine 3,2 mln qońyraý kelip túsken. Onyń 40 prosenti ǵana quqyq qorǵaý organdarynyń qyzmetine qatysty bolǵan.
– Bizde barlyǵy 220 operator táýligine 24 saǵat boıy jumys isteıdi. Almatyda bar-joǵy 24 operator, Astanada – 26. Búginde olardyń sanyn arttyryp, 12 saǵattyq jumys kúnine aýystyrdyq. 3,2 mln qońyraýdyń ishinde 40 prosenti ǵana polısııa jumysyna qatysty boldy. Máselen, Almatyda bir azamat operatorǵa 3000 ret habarlasyp, únemi turǵyn úıine qatysty jáne basqa da suraqtarmen shaǵymdana bergen, – dedi Q.Qasymov.
Serik ÁBDIBEK,
«Egemen Qazaqstan»
