TRT Haber agenttigi N.Nazarbaevty Túrkııa Prezıdenti Rejep Taııp Erdoǵan óziniń ordasynda saltanatpen qarsy alǵanyn jazady. «Erdoǵan Memleket basshysynyń «Kúlıesi» aldynda N.Nazarbaevty kútip aldy. Prezıdentter arnaıy orynǵa kelgende eki eldiń ánurany oınap, 21 ret zeńbirek oǵy atyldy. Qazaqstan Prezıdenti N.Nazarbaev qurmetti qaraýyldarǵa túrikshe «Sálem, ásker» dep amandasty. Sondaı-aq alańda tarıhta qurylǵan 16 túrik memleketi men olardyń týyn ustaǵan arnaıy ásker de boldy», deıdi TRT Haber.
Agenttiktiń málimetine súıensek, Túrkııa Syrtqy ister mınıstri Mevlýt Chavýshoǵlý, Ulttyq qorǵanys mınıstri Ýlýsı Akar, Energektıka jáne tabıǵı resýrstar mınıstri Fatıh Dónmez, Mádenıet jáne týrızm mınıstri Mehmet Nýrı Ersoı, Transport jáne ınfrastrýktýra mınıstri Mehmet Jahıt Týrhan da Elbasyny qarsy alǵan delegasııanyń quramynda bolǵan.
Agenttik eki el basshylarynyń baspasóz jıynynda birqatar mańyzdy máseleler talqylaǵanyn, Qazaqstan men Túrkııa qarym-qatynasyn nyǵaıta túsý úshin áli de atqaratyn sharalardyń mol ekenine keńinen toqtalyp ótken.
«Memleket basshysy Erdoǵan Beshtepede Qazaqstan Prezıdenti Nursultan Nazarbaevpen jeke kezdesýden keıin Joǵary deńgeıli strategııalyq áriptestik jıynyna qatysyp, tóraǵalyq etti. Erdoǵan Nazarbaevpen ótken eki jaqty kezdesýlerde birqatar máselelerdi talqylady», dep habarlaıdy Hurriet.
Basylym birqatar mańyzdy qujattarǵa qol qoıylǵanyn, taraptar ekonomıka, saýda salalaryn damyta túsýge keliskenin, sondaı-aq jalpy somasy shamamen 2 mıllıard dollardan asatyn 20-dan astam qujatqa eki eldiń jaýapty mekemeleri men jekemenshik sektory ókilderi qol qoıǵanyn jetkizdi.
Yeni Akit gazeti Qazaqstan Prezıdenti Nursultan Nazarbaevtyń Túrkııaǵa resmı sapary barysynda Túrkııa Prezıdenti Rejep Taııp Erdoǵanmen kezdesip, 2 mıllıard dollarlyq kelisimge kelgenin habarlady.
«Baspasóz jıynynda «Mártebeli, Memleket basshysy», «Qurmetti, aqsaqalym» degen Erdoǵan Qazaqstanda bastaý alǵan Joǵary deńgeıli strategııalyq yntymaqtastyq keńesiniń úshinshi jıynyna qatysyp otyrǵany jáne N.Nazarbaev bastaǵan delegasııany óz ordasynda kútip alǵanyna qýanyshty ekenin jetkizdi», deıdi Yeni Akit.
Basylymnyń habarlaýynsha, R.Erdoǵan Elbasy N.Nazarbaevpen Túrki keńesiniń VI sammıtinde jolyqqanyn eske salyp ótip, kún tártibinde turǵan eń mańyzdy máselelerdi talqylaǵanyn atap ótken. Sondaı-aq Túrkııa Prezıdenti eki el arasynda 5 mańyzdy qujatqa qol qoıylǵanyn da aıtqan.
«Memleket basshysy Erdoǵan atajurt Qazaqstannan Nazarbaev bastaǵan delegasııanyń kelýi ózderin qýantqanyn málimdep, «Tamyry tereń tarıhymyzdan bastaý alǵan Túrkııa-Qazaqstan qarym-qatynastarynyń keleshegi odan ári damı túsetinine senim bildiremin», dedi. Sondaı-aq eki el arasyndaǵy dıplomatııalyq baılanystar budan keıin de jalǵasa beretinine senim bildirdi», dep habarlaıdy Yeni Akit.
Daıyndaǵan
Abaı ASANKELDIULY,
«Egemen Qazaqstan»
