Ortalyqtyń birinshi qabatynda aıaǵyn apyl-tapyl basqan búldirshinderge arnalǵan aınalmaly átkenshek, ártúrli oıyn avtomattary, avtodrom, bı alańy, sharlar anımatory, kompıýter zaly bar. Al ekinshi qabatta bes jasqa deıingi balaqandarǵa arnalǵan basseın-labırınt ornalasqan. Ekpin túsirip aıta ketetin bir másele – ortalyqtyń ásemdigi. Qaı tarapqa qarasań da kóz sýaratyn kórkemdikti baıqar edińiz. Barlyq alań ásem bezendirilgen. Ishine kirgennen-aq janyń jaı tabatyn jaılylyq balalardyń ýaqyttaryn kóńildi ótkizýlerine mol múmkindik beredi.
Ekinshi qabatta jetkinshekterge arnalǵan taýarlar satylady. Baǵasy da qoljetimdi. Onyń ishinde syrtqy beınesi ádemi keskindelgen áralýan taqyryptaǵy ertegi kitaptar, túrli oıynshyqtar, tipti kıim-keshekterge deıin bar. Bul jerde jalǵyz oıyn túrleri ǵana emes, balalardyń týǵan kúnderin óz qurbylarymen atap ótýi úshin tapsyrys berýge de bolady. Jańa ortalyqtyń ıesi, jergilikti kásipker Aıgúl Aıteeva óz qarajatyna záýlim ortalyq salyp, bolashaq ıeleriniń alańsyz ósip jetilýine táp-táýir múmkindik týdyryp otyr.
Baıqal BAIÁDIL,
«Egemen Qazaqstan»
Aqmola oblysy,
Atbasar aýdany
