Qurmetti meımandardy Sarqan qalasynyń kire berisinde qarsy alǵan ákimshilik qyzmetkerleri men jergilikti mekeme basshylary Alashtyń ardaqty uly, kórnekti qoǵam jáne memleket qaıratkeri, tarıhshy, aǵartýshy, tuńǵysh temir jol ınjeneri Muhametjan Tynyshbaev pen Uly Otan soǵysy jáne Japonııamen bolǵan jaýyngerlik qaqtyǵysqa qatysqan zapastaǵy general-maıor Ábdiqadyr Bolsambekovtyń eskertkishterine gúl shoqtaryn qoıdy. Uly tulǵaǵa taǵzym jasaǵan qonaqtar taý bókterin jaǵalap, Ekiasha aýylyna qaraı jol tartty. Ol jerde merekelik ǵylymı-praktıkalyq konferensııa uıymdastyryldy. Osy jıyn barysynda aýdannyń tarıhy, qazirgi tynys-tirshiligi, ekonomıkalyq áleýeti, túrli salada qol jetkizgen tabystary jáne de búgingi tańda kún tártibinde turǵan ózekti máseleler týraly keńinen áńgime qozǵalyp, keleli oılar aıtyldy.
Rasynda da Sarqan topyraǵynan eldiń qoshemetine bólengen azamattar kóptep shyqqan. Olardyń kósh basynda qazaqtyń shejiresin tizbektegen Muhametjan Tynyshpaevtan bastap, memleket qaıratkeri Kákimjan Qazybaev, mýzyka óneriniń sańlaqtary Muqan Tóleýbaev pen Erkeǵalı Rahmadıev, kıno óneriniń maıtalmany Quman Tastanbekov, dańqty balýandar Ábilseıit Aıhanov pen Amanjol Buǵybaev jáne basqa da iri tulǵalardyń ómir jolynan qysqasha derekter keltirildi.
Tús bel ortadan aýǵanan soń aqyndar aıtysy uıymdastyryldy. Tórt saǵatqa sozylǵan jyr dodasynda birinshi oryndy Aıdana Qasabek jeńip alsa, ekinshi oryn Qazybek Jeńishanǵa buıyrdy. Úshinshi oryndy aqsýlyq Qanat Boqan aldy. Kesh bata jergilikti ónerpazdar jáne osy sharaǵa arnaıy shaqyrylǵan óner jáne estrada juldyzdarynyń qatysýymen Amanbókter aýylynda merekelik konsert ótti.
Kelesi kúni tań ata qonaqtar Sarqan aýdanynyń qol jetkizgen jetistikterine arnalǵan kórmeni aralady. Sodan keıin saltanatty jıyn uıymdastyryldy. Birinshi bolyp ortaǵa shyqqan Almaty oblysy ákiminiń birinshi orynbasary Lazzat Turlashov sóz sóılep, Elbasynyń «Rýhanı jańǵyrý: bolashaqqa baǵdar» maqalasyna baılanysty aýdanda kóptegen istiń atqarylǵanyn da aıta kele, oblys ákimi Amandyq Batalovtyń quttyqtaýyn jetkizdi. Odan keıin sóz alǵan aýdan ákimi Erǵazy Qoshanbekov aıtýly óńirde Qazaqstan Respýblıkasy Prezıdenti Nursultan Nazarbaevtyń tapsyrmalary qalaı júzege asyp jatqany jaıynda baıandama jasady.
Memleket basshysynyń tapsyrmalaryn, aldaǵy kúnderge mejelegen maqsattar men mindetterdi iske asyrý baǵytynda biz búgin de jumyla jumys júrgizip kelemiz. Aýdan boıynsha shaǵyn jáne orta kásipkerliktiń deńgeıi artty, salyqtar men bıýdjettiń túsimi ósti. Áleýmettik, densaýlyq saqtaý, bilim berý salalarynda aýyz toltyryp aıtarlyq jetistikterimiz jurtshylyqtyń kóz aldynda. Jetisý óńirinde uranǵa aınalǵan tátti túbir kólemin burynǵy deńgeıge jetkizý maqsatynda qol jetken jetistikterimiz agrarlyq sala eńbekkerleriniń eren eńbeginiń nátıjesi ekeni anyq. Osy jumystardyń dáleli retinde ánshi-sazgerlerimiz ben qolóner sheberleri búgingi merekege ulttyq dástúrimizdiń alýan túrli boıaýlaryn ákelse, berekeli kúzdiń keýsenindeı aýylsharýashylyq mamandarymyz ózderi óndirgen ónimderin, ósirgen tórt túligin jergilikti jurtshylyqqa usynyp otyr.
Iá, aýdan qurylǵannan bastap, osy ýaqyt aralyǵynda talaı ózgeristerdiń bolǵany ózderińizge de málim. Tek turǵyndardyń týǵan jer men Otanǵa degen súıispenshiligi ǵana esh ózgergen joq. Osydan 90 jyl buryn negizi qalanǵan aýdanymyz búgingi tańda da durys baǵytpen damý ústinde. Qadirmendi qaýym! Elbasymyz Nursultan Ábishuly Nazarbaevtyń «Merkelik kúnderge jetkizgen berekeli tirligimiz baıandy bolsyn» dep barsha jurtty yntymaqqa shaqyrǵandaı, bizdiń kúshimiz ben senimimiz halyqtyń birligi men yntymaqtastyǵynda qala bermek», – deıdi Sarqan aýdanyny ákimi Erǵazy Qoshanbekov.
Osy shara barysynda elimizdiń jáne sol óńirdiń órkendeýine, kórkeıýine úles qosqan ǵalym-akademık Amankeldi Bekbaev, óner qaıratkeri Saıat Merekeuly, medısına salasynyń ardageri Tóken Bleskeldınov, ardager ustaz Myrzahan Qabasov, aýylsharýashylyq salasynyń qart mamany Jangeldi Zamanbekov, general Amankeldi Qurmanǵalıev syndy bir top tulǵalarǵa «Sarqan aýdanynyń Qurmetti azamaty» ataǵy berildi.
90 jyldyq mereıtoıǵa oraı ótkizilgen osy is-sharanyń resmı bóligi odan keıin merekelik konsert pen teatrlandyrylǵan qoıylymǵa ulasyp, ulttyq sport túrlerinen jarystar uıymdastyryldy.
Ǵalym SÚLEIMEN,
«Egemen Qazaqstan»
Almaty oblysy
Sarqan aýdany
