«Qazaqstan men Germanııa arasyndaǵy yntymaqtastyqtyń dınamıkasy qarym-qatynastyń búkil aýqymy boıynsha turaqty damý sıpatyna ıe boldy. Bul turǵyda Qazaqstan Respýblıkasynyń Prezıdenti Nursultan Nazarbaev pen Germanııa Federatıvtik Respýblıkasynyń Federaldy Prezıdenti Frank-Valter Shtaınmaıer jáne Kansleri Angela Merkel arasyndaǵy joǵary deńgeıde turaqty baılanystar erekshe mańyzdylyqqa ıe», - dedi Q. Ábdirahmanov.
Qazaqstannyń syrtqy saıası vedomstvosynyń basshysy saýda-ekonomıkalyq jáne ınvestısııalyq salalarda aıtarlyqtaı áleýettiń bar ekendigin atap ótti.
Qazaqstan Germanııanyń Ortalyq Azııadaǵy syrtqy saıası jáne ekonomıkalyq belsendiliktiń basym baǵyty retinde qarastyrylatyndyǵy týraly jáne GFR-dyń 2019-2020 jj. arnalǵan BUU Qaýipsizdik Keńesiniń turaqty emes músheligine qoldaý kórsetkendigi úshin alǵys aıtyldy.
Taraptar ekijaqty saýda-ekonomıkalyq yntymaqtastyqtyń perspektıvalaryn jeke talqylap, Qazaqstan men Germanııa arasyndaǵy taýar aınalymynyń turaqty ósýin qanaǵattanarlyqpen atap ótti. Jalpy, 2017 jyly elderimiz arasyndaǵy taýar aınalymy 4,9 mlrd. AQSh dollarǵa jetti.
Investısııalyq yntymaqtastyqty tereńdetýde aıtarlyqtaı áleýettiń bar ekendigi atap ótildi. 2017 jyly Qazaqstan ekonomıkasyna Germanııanyń tikeleı ınvestısııalardyń jalpy aǵymy 345 mln. AQSh dollardan asty. Jalpy, 2005 jylǵy qańtardan 2018 jyldyń qańtaryna deıin Germanııadan Qazaqstanǵa tikeleı ınvestısııalardyń jalpy aǵymy 4,2 mlrd. AQSh dollardan asyp tústi.
Qazaqstan ekonomıkasyna nemis ınvestısııalardyń 90 paıyzdan astamy «shıkizattyq emes» salaǵa, atap aıtqanda óńdeý ónerkásibine, hımııa ónerkásibine, qurylys materıaldaryn óndirý, kólik jáne agrokeshenine jatatyny erekshe atap ótildi. Osyǵan baılanysty, Germanııanyń Indýstrııa 4.0 ónerkásiptik tehnologııalardy engizýdegi jetistikterin eskere otyryp, atalǵan saladaǵy aldaǵy yntymaqtastyqtyń mańyzdylyǵy atap ótildi. Buǵan shıkizat, ónerkásiptik jáne tehnologııalyq salalardaǵy Áriptestik týraly eki jaqty kelisim jaqsy demeý beredi.
Taraptar ózara is-qımyldyń qoldanystaǵy jáne jańa ınstıtýttar arqyly eki jaqty baılanystardyń ósý qarqynyn qoldaýdy jalǵastyrýǵa ýaǵdalasty.
Sondaı-aq, halyqaralyq kún tártibindegi ózekti máseleler boıynsha, sonyń ishinde Sırııa men KHDR janyndaǵy jaǵdaı týraly pikir almasty.
