Elimizdiń atynan óner kórsetken shýlyq ónerpazdardy Túrkııa jerine Shý aýdany ákiminiń orynbasary Klara Qojaǵappanova, Jambyl oblystyq mádenıet, arhıvter jáne qujattama basqarmasynyń bas mamany Erkejan Sembaeva, oblystyq halyq shyǵarmashylyǵy ortalyǵynyń kórkemdik jetekshisi Elmıra Dútbaeva jáne Qazaqstannyń eńbek sińirgen qaıratkeri Áýeshan Kelgenbaev bastap barǵan bolatyn.
О́ner merekesiniń aldynda jambyldyq delegasııa Etımesgýt aýdanynyń meri Enver Demıreldiń qabyldaýynda bolyp, áýlıeatalyq sheberlerdiń qolynan shyqqan Jambyl Jabaevtyń beınesi salynǵan kilemsheni syıǵa tartty. On kúnge sozylǵan dástúrli festıval aıasynda birqatar túrki tildes memleketter men Túrkııanyń óner juldyzdarymen qatar, jambyldyqtar da kórermenderdi rıza etken. Shara barysynda Shý aýdanynan barǵan ónerpazdar «Jan erkem», «Aýylyń seniń irgeli» sııaqty halyq ánderimen qatar, Maılyqojanyń «О́sıet» termesin, Ábdimomyn Jeldibaevtyń «Erkesylqym» kúıin oryndap, Eskendir Hasanǵalıevtiń «Atameken», Mels О́zbekovtiń «Tolqıdy Shýym» ánderin shyrqady. Al Ankara tórinde qazaq ónerin áıgilegen «Ásem áýen» folklorlyq ansamblin túriktiń «Bengú» arnasynyń tikeleı efırden kórsetýi de atap ótýge turarlyq jetistik. Sonymen qatar Enver Demıreldiń kelesi jyly Túrkııada kúıshi Ábdimomyn Jeldibaevtyń shyǵarmashylyq keshin ótkizý týraly usynysy da qazaq mádenıetine kórsetilgen qurmet. Al dástúrli festıval sońynda elimizdiń Túrkııadaǵy Tótenshe jáne ókiletti elshisi Abzal Saparbekuly áýlıeatalyq ónerpazdarǵa alǵysyn bildirdi. Budan keıin jambyldyqtar Nıgde qalasynda da óner kórsetti.
Shý aýdany ákiminiń orynbasary Klara Qojaǵappanovanyń aıtýynsha, Túrkııanyń Nıgde qalasynyń Altaı degen aýylynda kileń qazaq ulty ókilderi turady eken. Altaılyqtar da Jambyl óńirinen barǵan baýyrlaryn qurmetpen qarsy alyp, qandastar ónerin tamashalaý úshin qalaǵa arnaıy kelipti. Aıta keteıik, on bes jyl buryn bastaý alǵan dástúrli festıvalǵa óńirimizden ótken jyly T.Rysqulov aýdanynyń ónerpazdary qatysyp qaıtqan bolatyn.
Hamıt ESAMAN,
«Egemen Qazaqstan»
Jambyl oblysy
