Sonyń ishindegi negizgi basymdyqqa ıe bolǵan jobanyń biri «Tegin IT synyptaryn ashý» partııalyq jobasy. Bul maqsatta mamyr aıynan bastap qolǵa alǵan jumys nátıjesi boıynsha Aqmola oblysynyń mektepterinde 61 tegin IT synyptary ashyldy. Zamanaýı kompıýter, 3D prınterlerimen jabdyqtalyp, ınternet jelisine qosylǵan synyptar 900-ge jýyq oqýshyǵa «Pascal», «Java», «PhP», «Delph» sııaqty baǵdarlamalaý tilderi men robot tehnıkasy jaıynda tereńdetilgen bilim alýǵa múmkindik berýde.
Robottehnıka negizderi men kompıýterlik baǵdarlamalardy tereńdete oqytatyn IT synyptary 32 saǵattyq baǵdarlama boıynsha jumys isteıdi. Al, 40 ustazdyń jalaqysyn tóleýdi jergilikti mesenattar men bıznes ókilderi óz moıyndaryna alyp otyr.
Máselen, Selınograd aýdanyndaǵy №5 mektepte ashylǵan IT synybyna «Shańyraq» JShS-niń dırektory, oblystyq máslıhat depýtaty Maksım Bojko demeýshilik jasasa, Zerendi aýdanyna qarasty 7 mektepte atalmysh synyptardyń ashylýyna járdemdesken «Azat» JShS-niń dırektory Natalıa Gorbýnova qarjylaı kómek kórsetken.
Búginde Selınograd aýdanynda – 6, Astrahanda – 10, Kókshetaý, Stepnogorsk qalalarynda – 3-eýden, Aqkól jáne Arshaly aýdandarynda – 3, Atbasar, Bulandy, Býrabaı, Egindikól, Esil, Birjan sal aýdandarynda – 2-eýden, Sandyktaý aýdanynda – 6, Jarqaıyń, Qorǵaljyn jáne Shortandy aýdandarynda 1 synyptan ashylyp, jumysyn bastap ketti.
M.Ǵabdýllın atyndaǵy №3 kóptilde oqytatyn kásibı mektep-gımnazııasynda balalarǵa baǵdarlamalaý negizderin oqytatyn tegin IT-synyby jumys isteıdi. Osy arqyly oqýshylar «Pascal», «Java», «PhP», «Delph» sııaqty baǵdarlamalaý tilderi men robot tehnıkasy jaıynda tereńdetilgen bilim alýǵa múmkindik alyp otyr. Sondaı-aq, ótken jyly mektep bazasynda «Baǵdarlamalaý» úıirmesi ashylyp, oqýshylardyń IT tehnologııa, 3D modeldeý sııaqty jańa ınnovasııalyq baǵytta bilim alýyna jol ashylǵan. Nátıjesinde mektep oqýshylary túrli ınnovasııalyq jobalar baıqaýynda top jaryp, joǵary jetistikterge qol jetkizip keledi. Búginde kókshetaýlyq mektep oqýshylary keńinen qoldanatyn, 9 jəne 11-synyp oqýshylarynyń memlekettik emtıhan men ulttyq biryńǵaı testileýge daıyndalýyna arnalǵan veb-saıtty da dál osy mektep-gımnazııanyń jas ónertapqyshtary oılap tapqan.
Jalpy, balanyń oı órisi men bilimin shyńdaýǵa arnalǵan partııanyń tyń jobasy 2020 jylǵa deıin jalǵasyn tappaqshy.
Baıqal BAIÁDIL,
«Egemen Qazaqstan»
Aqmola oblysy
