Atalǵan bilim berý oshaǵy dırektorynyń ǵylymı-ádistemelik isi jónindegi orynbasary, jańartylǵan bilim berý mazmuny boıynsha jaýapty qyzmetkeri Gaýhar Elǵonova bul rette de birqatar jetistiktiń bar ekenin aıtty. Baıqaǵanymyzdaı, munda bıologııa pániniń muǵalimderi Aıjan Qarǵabaeva, Jańagúl Tilebaldıeva, Áıgerim Ospanova, fızıka pániniń muǵalimi Lázzat Aıdarova jáne ınformatıka pániniń muǵalimi Aıjan Qýanyshbaeva sııaqty biliktilik kýrsynan ótken muǵalimder óz pánderin aǵylshyn tilinde júrgizedi eken. Al 2015-2016 oqý jylynan bastap №1 mektep-lıseıiniń ujymy Kembrıdj ýnıversıteti bilim berý fakýlteti zertteý tobynyń Olena Fımıar, Tsedıso Makoel, Mıshel Somerton sııaqty jetekshilerimen jumys istep keledi. Nátıjesinde aǵylshyn tilinde bilim berý máselesi atalǵan mektepte birjola jolǵa qoıylady.
T.Rysqulov aýdanyndaǵy №1 mektep-lıseıi 2015 jyldan beri jańartylǵan bilim berý mazmunyn aprobasııadan ótkizdi. Qanatqaqty synyptyń muǵalimi Aıjan Shajalıeva bizdi óziniń sabaq ótý ereksheligimen tanystyrdy. Iаǵnı, oqýshylardy ózi oqyp otyrǵan sabaqqa yntalandyrý, olardyń kózqarasyn bilý – basty maqsat. Muǵalim oqýshylardyń oılaý deńgeılerin bilý, túsiný, qoldaý dep úsh túrge bóledi. «О́ner» sabaǵynda «Aqyn degen kim?» degen saýal arqyly oqýshylardy keıipkerlerdiń is-áreketin baǵalaý, tyńdarmannyń nazaryn aýdartý, ádebı shyǵarmanyń janryn anyqtaý, qateni tabý jáne túzetý sııaqty erekshelikterge úıretedi. «Sabaqtyń maqsaty – negizgi tirek sózder men sóz tirkesteri arqyly shyǵarmanyń taqyryby boıynsha aqyn týraly túsindirý. Qundylyqtardy darytý boıynsha oqýshy yntymaqtastyq, birlik jáne syılastyqty túısinedi. Al oqýlyqpen jumys barysynda balalar mátindi tizbektep ishteı oqıdy, juppen talqylaıdy jáne rólge enip oryndaıdy. Sońynda balalardyń sabaqqa qanshalyqty qatysqandaryn ózderiniń kómegimen keri baılanys jasatý arqyly bilemiz», deıdi Aıjan Qoıshyǵulqyzy. Sonymen qatar bul aıtylǵandardyń, sabaq barysynda jazylǵan dúnıelerdiń bári de oqýshylarǵa aǵylshyn tilinde túsindiriledi eken.
Ár muǵalimniń sabaq ótý tásili árqalaı. Desek te jańashyldyqqa umtylý arqyly oqýshylardy ózindik oılaýǵa jeteleý árbir ulaǵatty ustazdyń isi bolmaq. Búginde atalǵan mektep ınteraktıvti taqtalarmen jabdyqtalǵan. Sonymen qatar tarıh jáne aǵylshyn tilinen resýrs ortalyǵy, psıhologııalyq jáne medısınalyq ortalyq ta bar. Budan ózge de bilim oshaǵynda oqýshylardyń básekege qabilettiligin arttyryp, zamanaýı bilim alýǵa tıisti múmkindikter qarastyrylǵan.
Hamıt ESAMAN,
«Egemen Qazaqstan»
Jambyl oblysy
