«Rýhanı jańǵyrý» baǵdarlamasy ulttyq tárbıe berýdi talap etedi. Ulttyq tárbıe jas urpaqqa otbasy, balabaqsha, mektep arqyly beriletini anyq. Qazir mektepterde Abaı muralaryn nasıhattaý, jergilikti aqyn-jazýshylar shyǵarmalary muralaryn oqýshyǵa jetkizý, bı-sheshenderdiń naqyl sózderi men kúıshilik ónerdi dáripteýge arnalǵan sabaqtar, qoldanbaly kýrstar, synyptan tys jumystar júrgizilýde. Biz bul qundylyqtardy ózgermeli zamanǵa laıyqty oqytyp, urpaq ıgiligine aınaldyrýymyz kerek. Bilim berý salasy únemi ulttyq sıpatpen baıytylsa, jas urpaqtyń boıynan irgeli el bolýǵa laıyqty qasıetter tabylar edi.
Osy maqsattardy júzege asyrý jolynda mekteptegi is-sharalardyń qataryna synyptan tys ólketaný sabaqtaryn, qoldanbaly kýrstardy ataýǵa bolady. Máselen «Mańǵystaý ádebıeti», «Mańǵystaý tarıhy», «Mańǵystaý geografııasy» oqýlyqtary oqýshylardyń tanym kókjıegin arttyryp, jergilikti óńirdiń qundylyqtaryn eskerýdi nyǵaıta túsýde. Byltyr qurylǵan «Abaı álemi» klýbynda danyshpan aqynnyń shyǵarmalaryn 3 tilde oqyp-úırený jalǵasýda. Sondaı-aq bı-sheshendik ónerdiń qazirgi ómirmen baılanystylyǵy dáriptelýde.
Jańa ǵasyr, jańa zamanda kim jaqsy jumys isteıdi, kim mamandyǵyn jetik meńgeredi, jańalyqqa qalaı tez qol jetkizedi, sonyń joly bolmaq. Qazirgi bilim – ulttyq rýhanı qundylyqtarǵa negizdelgen bilim. Sondyqtan qoǵamdyq sanany jańǵyrtýǵa baǵyttalǵan ıdeıa ýaqyt talaby men el damýynyń tarıhı kezeńine saı sheshim boldy.
Búgingi Qazaqstan damýynyń kepili – bilim. Bul tek ulttyq birlik jaǵdaıynda ǵana júzege asady. Elbasy ómirimizge dendep enip jatqan ǵalamdyq jańalyqtarǵa daıyn bolý kerektigin, jaıbasarlyqtan arylý kerektigin aıtyp, bilim men ǵylymdy ıgerýge úndep otyr. Al bizdiń jastarymyzdyń bilimge degen umtylysyn árkez baıqaýǵa bolady. Iаǵnı, áleýeti myqty jastarǵa tek durys baǵdar kerek.
Anar TО́LEÝOVA,
Jalaý Myńbaev atyndaǵy mektep-gımnazııasynyń qazaq tili men ádebıetiniń muǵalimi
Mańǵystaý oblysy,
Túpqaraǵan aýdany
