Elbasy Joldaýynda óńirlerde syrqat jandarǵa medısınalyq qyzmetti jaqsartyp, zamanaýı jabdyqtar men qondyrǵylardy ornatý, sannan góri sapaǵa kóńil aýdarý qajettigi aıtylǵan. Mine, osy baǵytta О́skemendegi oblystyq aýrýhananyń kardıologııa bólimshesi zamanaýı ozyq medısına apparattarymen jabdyqtala bastady. Sońǵy birer jylda munda júrek-qan tamyrlary, ınfarkt mıokardasy, ınsýlt, basqa da syrqattardy emdeıtin sheteldik qondyrǵylar ornatylǵan. Kardıologııa bólimshesiniń meńgerýshisi, joǵary sanatty dáriger Inna Oleınıktiń aıtýynsha, júrek-qan tamyrlaryna jınalǵan holesterındi koronogramma arqyly tazartý, júrekke operasııa jasaý, ıshemııalyq syrqattardy emdeý jaqsy jolǵa qoıylǵan.
– О́kinishke qaraı, ateroskleroz, qorshaǵan ortanyń búlinýi saldarynan ınfarkt, ınsýlt, júrektiń ıshemııalyq syrqattary «jasaryp» barady, – deıdi bólimshe meńgerýshisi Inna Aleksandrovna. – Senesiz be, qazir, 27, 30, 35 jastaǵy jastar júrek syrqatyna shaldyǵa bastady. Durys tamaqtanbaý, taza aýada serýendemeý, densaýlyǵyna salǵyrt qaraý saldarynan adamdar aýrýhanaǵa jıi túsedi. Bizdiń bólimshede 20 medbıke, 12 dáriger qyzmet etedi. Olardyń barlyǵy óz isiniń mamandary. Atap aıtqanda, dárigerler Baqyt Qaıyrbekova, Sáýle Kármenova, Gúlmıra Smaǵulova, Gaýhar Baıdasheva, Aızada Sadyqova, Darhan Qarymsaqov, aǵa medbıke Kenjegúl Maǵjaeva, medbıke Shynar Muhamedjanova syrqattardyń qas-qabaǵyna qarap, qoldan kelgen kómekterin aıamaıdy. Reti kelgende aıta ketý kerek, syrqattarǵa barlyq jaǵdaı jasalǵan, tórt mezgil tamaq beriledi.
Kardıologııa bólimshesimen irgeles endovıskýlıarly hırýrgııa bólimin tájirıbeli, óz isiniń bilimdi de bilikti mamany Qýatjan Ábishev basqarady. Semeı medısına akademııasynyń túlegi, Novosibir qalasyndaǵy akademık Metalkınniń klınıkasynda bilimin jetildirgen, Vashıngton, Parıj, Ystanbul qalalaryndaǵy ataqty klınıkalarda tájirıbeden ótken Qýatjan Maratulynyń aıtýynsha, ótken jyly óńirdiń 4800 adamyna angıograd tásili arqyly operasııa jasalǵan. «Stendgraft tásili (bilek tamyrynan asa sapaly metall jiberý arqyly bitelip qalǵan jerdi ashý) Eýropada alǵash ret 2011 jyly, bir jyldan keıin Qazaqstanda qoldanylǵan. Júrek-qan tamyrlaryn maı basý qaýipti syrqatqa ákeledi. Sondyqtan adamdar maıly taǵamdy shektep, taza aýada jıi qydyrǵandy ádetke aınaldyrǵandary jón, – deıdi bólimshe meńgerýshisi. – Tek júrekke stend qoıýmen shektelmeı, uıqy bezi, tamyr, buǵana, búırek, aıaq, basqa da syrqattardy emdeýge týra keledi. Angıograd tásilimen emdeıtin zamanaýı apparattar ala bastadyq. Bas, mı, aıaq tamyrlaryna qan júgirtý sııaqty kúrdeli operasııalardy jasaý – medısınanyń ozyq úlgisi. Oblystyq aýrýhananyń basshylary Jaıyq Jumahanov, onyń orynbasary Tólegen Jigitaev kún saıyn júrek syrqatyna shaldyqqandarmen jolyǵyp, olardyń tilegine qulaq asady, barlyq jaǵdaıdy jasaıdy, kómek kórsetedi».
Endovıskýlıarly hırýrgııa bólimshesinde Qýatjannan basqa taǵy úsh bilikti dáriger qyzmet etedi. Damır Júnisjanov, Roman Davydov, Rýslan Salımov búginge deıin júzdegen syrqatty emdedi. Olar jyl saıyn sheteldiń ozyq klınıkalarynda bilim jetildirip júr.
Syrqaty meńdep, qınalǵan kezde qol ushyn sozǵan aq jeleńdi abzal jandarǵa Zaısan aýdanynan kelgen eginshi Jeńisbek Qabylash, Dúısen Kúderov sııaqty azamattar alǵystaryn jaýdyrdy.
Ońdasyn ELÝBAI,
jýrnalıst
О́SKEMEN
Sýrette: kardıologııa jáne endovıskýlıar hırýrgııasynyń dárigerleri
