«Professor Tobyl Dáýletbaev daryndy ǵalym, ustaz ǵana emes, ádiletti, adamgershiligi mol, aınalasyna qamqor kisi edi. Júzdegen shákirt, maman tárbıeledi. Onyń ómiri men qyzmeti, jastarǵa bergen úlgisi keıingilerge ár kez ónege bolady» dedi Qostanaı memlekettik pedagogıka ýnıversıtetiniń rektory, professor Erkin Ábil.
Tobyl Dáýletbaev 1979 jyly kandıdattyq dıssertasııasyn qorǵap, fızıka-matematıka ǵylymdarynyń kandıdaty ǵylymı dárejesin alady. Odan keıingi jyldary ustazdyq ete júrip, ǵylymı izdenisterin toqtatqan joq. Arqalyq pedagogıka ınstıtýtynda, A.Baıtursynov atyndaǵy Qostanaı memlekettik ýnıversıtetinde, Qostanaı memlekettik pedagogıka ınstıtýtynda qyzmet istedi, joǵary matematıka kafedrasyn basqardy. Ǵalym matematıkany oqytýdy jetildirý baǵytynda tyńǵylyqty eńbek etti, muǵalimderge arnap eki oqý quralyn, 6 ádistemelik quraldar jazdy. Kafedra meńgerýshisi bolǵan jyldary oqytýshylardyń ekeýi ǵylym doktory, 20-sy ǵylym kandıdaty ataǵyn aldy.
Aýdıtorııanyń ashylý saltanatynda sóz sóılegender Tobyl Dáýletbaevtyń oblystyń ǵana emes, respýblıkanyń matematıkalyq bilim berý isin damytýǵa atsalysqanyn aıtty. Professorlar Amanjol Kúzembaıuly, Káriboz Japarov, Jeńisnur Qujykeev Tobyl Eslámǵalıulynyń talantty matematık jáne ustazdyǵyn, jastarǵa bilimdi ómirmen baılanystyra bilýdi úıretken kásibıligin erekshe bólip aıtty.
«Onyń adamgershiligi aınalasyna sáýle shashyp turǵandaı bolatyn. Fızıka-matematıka pánderine balalardyń, jastardyń yntasyn oıatýdyń ózi pedagogıkalyq kásibılikke keletin qasıet. Tobyl Eslámǵalıuly óńirdegi kóptegen matematıkterdiń naǵyz ustazy bola bildi», - dedi onyń áriptes inisi Jeńisnur Qujykeev.
Ǵalym-ustaz atyndaǵy aýdıtorııanyń ashylý saltanatyna jınalǵandar Tobyl Dáýletbaevtyń ǵylymı jumystary men ómirinen daıyndalǵan fotosýretter kórmesin tamashalady.
Názıra JÁRIMBET,
«Egemen Qazaqstan»
Qostanaı
