Basqosýdyń mańyzy týraly barsha qaýymdy habardar etken basylym basshysy Darhan Qydyráli baıyrǵy qalamgerdiń negizgi ereksheligi – aǵamyzdyń kindigi árqashan el gazeti «Egemenge» baılaýly, keler jyly 100 jyldyq mereıtoıy atap ótkizilgeli otyrǵan bas basylym tarıhyndaǵy eleýli tulǵalardyń biri degendi izgi iltıpatyn jetkize otyryp, Aqparat jáne kommýnıkasııalar mınıstri Dáýren Abaevtyń quttyqtaý hatyn oqyp berdi.
Rasynda 1960 jyldardyń sońynda ýnıversıtettiń sońǵy kýrsynda oqyp júrip «Sosıalıstik Qazaqstan» gazetine kishi ádebı qyzmetker bolyp ornalasqan qalamger osynda taban aýdarmaı 40 jylǵa jýyq qyzmet atqaryp, bir izben zeınetke shyqqan eken.
Ádil aǵa osy aralyqta gazettiń kúndelikti quj-quj qaınap jatqan sharýasyn atqara júrip, kórkem ádebıetke de qalam tartqan. Atap aıtqanda, «Aq kúmbez», «Kókjıek», « Júrek jylýy», «Tergeý áli bitken joq», «Qara shańyraq», «Sheraǵamnyń sherýi» jáne «Meniń Sheraǵam» atty esse-áńgime, novellalar jınaǵy eńbekqor jýrnalıstiń qalam qýatynyń aıǵaǵy ispettes.
Kezdesý barysynda Ádil aǵa basylym qyzmetkerlerine jýrnalıst kásibi óte qadirli mamandyq ekenin, sondyqtan myna otyrǵan sizder onyń qadir-qasıetin bilip, adaldyq tanytý basty qajettilik degendi basyp aıtty. Sonymen birge kópti kórgen kósheli aǵa ujymnyń berekesin ustap turatyn tatýlyq pen bereke-birlik, sol sebepti árkez bir-birlerińizdi syılap, qurmettep júrińizder, óziń jaqsy bolsań ómiriń de mándi bolady degen ónege-ósıetin jetkizdi.
О́z kezeginde Ádekenniń áriptesteri Janat Elshibek, Súleımen Mámet, Seıfolla Shaıynǵazy qatarly aldyńǵy býyn ókilderi jáne izin basqan Samat Musa, Ǵabıt Músirep, Talǵat Batyrhan, Jaqsybaı Samrat sekildi inileri júrekjardy lebizderin bildirip, tilektestik tanytty.
Beken QAIRATULY,
«Egemen Qazaqstan»
