Qazaqstan Sapa jáne Innovasııalyq menedjmenti uıymy, «Atameken» ulttyq kásipkerler palatasy jáne Azııa Sapa jelisiniń - ANQ uıymdastyrýymen ótken kongresske Norıakı Kano, Klaes Berlın, Mohamed Zaırı, Van Seon Shın, Lın Haı, t.b. sapa menedjmenti salasynyń kásipqoılary qatysty.
Kongresste «Atameken» Ulttyq kásipkerler palatasy tóraǵasynyń orynbasary Eldos Ramazanov «Atameken» UKP tóraǵasy Asqar Myrzahmetovtyń quttyqtaý sózin oqyp, qazaqstandyq kásipkerler úshin sharanyń mańyzdylyǵyna toqtaldy.
Búginde ekonomıkasy damyǵan elderdiń ozyq tájirıbesi ómirdiń barlyq salasyn qamtıdy. Al sapa fılosofııasy kez kelgen qazaqstandyq kompanııadaǵy basqarý júıesiniń ajyramas bóligine aınalýy qajet. Básekege qabiletti ónim tutynýshynyń joǵary talaptary men suranysyn qamtamasyz etýge tıis.
Tórtinshi ónerkásiptik revolıýsııa jaǵdaıyndaǵy damýdyń jańa múmkindikterinde sapa menedjmentiniń róli aıryqsha. QR Tehnıkalyq retteý jáne metrologııa komıtetiniń tóraǵasy Arman Shaqqalıev «Jedel básekelestik jaǵdaıynda álemdik naryqta óndiristiń tehnologııalyq turǵydan jańǵyrýyn, menedjmenttiń qazirgi zamanǵy ınnovasııalyq júıelerin, jańa bastamalar men sapany qoldaý asa ózekti bolyp otyr. Tájirıbeli menedjerlerdiń bir alańda bas qosýy respýblıkada halyqaralyq standarttardy engizýdi jedeldetýmen qatar qazaqstandyq óndirýshiler úshin ónimniń, qyzmet túrleriniń básekege qabilettiligin nyǵaıtýǵa múmkindik beretindigine» toqtaldy.
Búginde ANQ Azııada ǵylym men tehnıkanyń damýyna yqpaldasý, ónerkásiptiń damýy men adam ómiriniń sapasyn jaqsartýdy maqsat etedi.
Qatań básekelestik jaǵdaıynda ekonomıkanyń barlyq salasynda kompanııalar úshin tutynýshymen uzaq merzimdi ári ózara tıimdi áreketterdiń róli zor. Tıimdi qarym-qatynastar qurýda tutynýshynyń kóńilinen shyǵýdy baǵalaý ádisteri men baǵdarlamalar turaqty jetildirilip otyrýy tıis. Búginde quramyna Qazaqstan, Úndistan, Qytaı, Ońtústik Koreıa, Reseı, Sıngapýr, Japonııa, Taıland, t.b. Azııanyń 17-den astam memleketteriniń Ulttyq sapa uıymdary kiretin ANQ qurýdyń bastamashysy, sapa menedjmentiniń bilgir mamany Kano ádisi taýarǵa tutynýshy kózimen qarap, onyń qundy ári tıimsiz tustaryn baǵalaýǵa múmkindik beredi. Taýar nemese qyzmet túrlerin usynǵanda birinshi kezekte qandaı ónim unaıtyndyǵyna baılanysty tutynýshylar talaptaryna nazar aýdarý qajet. Ǵalymnyń zertteý jumystarynyń nátıjesine oraı Kano ádisi óndiriske 90-jyldardyń basynan bastap engizile bastady.
«Azııa Sapa jelisi osydan 16 jyl buryn óndiristiń barlyq salasynda sapany arttyrýdy maqsat ete otyryp qurylǵan-dy. Kongress aıasynda qol qoıylǵan kelisimder Qazaqstannyń barlyq kásiporyndaryn sapa deńgeıine kóterýge yqpal etedi. Úkimet organdaryna kásipkerlerdiń jumysyn jeńildetýge baǵyttalǵan sharalardy atqarýǵa múmkindik beredi. Basqarý, ınnovasııalardy paıdalaný, sapaly ónim qataryn kóbeıtip, kórsetiletin qyzmetterdiń sapasyn arttyrýdaǵy ozyq tájirıbelermen bólisýdi maqsat etedi», - dedi Norıakı Kano.
Al sapa menejdementin basqarý, qyzmet kórsetý salalaryndaǵy erekshelikteri men ónerkásiptegi basymdyqtary turǵysyndaǵy pikirlerimen bólisken Klaes Berlın, Mohamed Zaırı, Van Seon Shın, Lın Haı óz tájirıbelerindegi sapa júıesiniń ozyq úlgilerine toqtaldy.
Azııa sapa jelisiniń prezıdenti Azat Ábdirahmanovtyń aıýynsha, sapa menedjmentin damytý, onyń negizgi qaǵıdattarymen bólisý kez kelgen kompanııa úshin mańyzdy. Ǵalamdyq ekonomıkalyq daǵdarystar kezeńi óndiris oryndarynan sapany arttyrýdy talap etedi. Búginde damyǵan elder ekonomıkasyn úlgi ete otyryp, Japonııa, Ońtústik-Shyǵys Azııadaǵy sapa menedjmentine nazar aýdarýǵa tıispiz. Sapa baǵanyń tómendeýine ǵana emes, jemqorlyqpen kúresýge de múmkindik beredi. Qazaqstan úshin ónerkásip alańdaryna sapa menedjmentin engizý ýaqyt kúttirmeıtin másele. Osy turǵyda basqarý júıesiniń, mamandar oqytýdyń mańyzy joǵary. Sapa jańa tehnologııalardy ıgerip, ony óndiriske engizýmen shektelmeıdi. Kompanııanyń bedeli, taýardyń zor suranysqa ıe bolýy sapa saıasatyn, sapa strategııasyn meńgergen menedjerlerdiń biliktiligimen baılanysty.
Kongresste ANQ men «Atameken» UKP arasynda qazaqstandyq bıznesmender, kásiperler úshin kompanııalardy basqarýdyń eń ozyq úlgilerimen tanystyrýdy, básekege qabilettilikke qol jetkizýde aqparat almasý men óndiris oryndarynyń ónimderi, kórsetetin qyzmetterine baǵyttalǵan kelisimge qol qoıylyp, ANQ qurmetti prezıdenti Norıakı Kano saladaǵy úzdik menedjerlerge arnaıy syılyqtar tapsyrdy.
Kongress sheńberinde kásiporyndar arasynda yntymaqtastyqqa qol jetkizilip, qazaqstandyq óndirýshilerdiń kórmesi aıasynda halyqaralyq yqpaldastyq kelisimderine qol qoıyldy.
Kongress «Bir beldeý – bir jol» baǵdarlamasy aıasynda Halyqaralyq Sapa alıansynyń forýmy, ANQ otyrystary, sımpozıýmmen jalǵasyn tapty.
Elvıra SERIKQYZY,
«Egemen Qazaqstan»
ALMATY
