Alqaly jıynǵa zań shyǵarýshy, atqarýshy jáne sot tarmaqtarynyń ókilderi, halyqaralyq jáne úkimettik emes uıymdardyń, advokatýranyń jáne BAQ ókilderi qatysty. Jıyndy ashqan Q. Sultanov komıssııanyń qataryna Qoǵamdyq damý mınıstri Darhan Kaletaevtyń qosylǵanyn jarııalady.
Is-shara barysynda Aqparat jáne kommýnıkasııalar mınıstri Dáýren Abaev «Aqparatqa qol jetkizýdi qamtamasyz etýdegi aqparattyq-kommýnıkasııalyq tehnologııalardyń róli» taqyrybynda baıandama jasady.
«Memlekettik basqarýdy reformalaý, azamattyq qoǵamdy damytý jáne sybaılas jemqorlyqqa qarsy kúres prosesinde aqparattyń ashyqtyǵy jáne qol jetimdiligi mańyzdy ról atqarady. Aqparatqa qol jetkizý quqyǵynyń áleýmettik mańyzdylyǵy da aıqyn. Memlekettik organdar qyzmetiniń ashyqtyǵy olardyń tarapynan teris paıdalaný múmkindigin azaıtady, ıaǵnı adam quqyqtarynyń qorǵalý deńgeıin arttyrady», dedi vedomstvo basshysy.
Mınıstr aqparatqa qoljetimdilikti qamtamasyz etý úshin arnaıy qurylǵan «Ashyq Úkimet» portaldarynyń qyzmetine toqtaldy.
Búginde «Ashyq derekter» portalynda ornalastyrylǵan derekter jıyntyǵynyń sany – 3179. Portaldyń derekteri negizinde 23 qosymsha ázirlengen.
«Ashyq normatıvtik quqyqtyq aktiler» portalynda ashyq túrde memlekettik kórsetiletin qyzmetter standarttaryn qosa alǵanda, normatıvtik quqyqtyq aktilerdiń jobalary jarııa talqylanady. Portal jumys istegen kezeń ishinde 29 143 NQA jobasy jarııalandy, olarǵa 14 000-nan astam pikirler qaldyryldy», dedi D. Abaev.
Mınıstrdiń aıtýynsha, aqparatpen qamtamasyz etýdegi barlyq problemalardy sheshý úshin keshendi tásil qajet. Osy maqsatta Ulybrıtanııanyń tájirıbesine súıene otyryp, memlekettik organdardyń biryńǵaı saıtyn qurý boıynsha jumys júrgizilip jatyr. Bul rette, biryńǵaı saıtty qurý jyl saıyn aqparattyq resýrstardy ázirleý men súıemeldeýge bólinetin shyǵystardy eki esedeı qysqartýǵa múmkindik beredi. Baıandama sońynda mınıstr «Ashyq Úkimet» qaǵıdattaryn ilgeriletý boıynsha aldaǵy ýaqytta atqarylatyn jumystarǵa toqtaldy. 2019 jyly memlekettik ortalyq organdardyń, 2020 jyly jergilikti atqarýshy organdardyń ınternet-resýrstaryn birińǵaı platformaǵa kóshirý josparlanǵan.
«Ashyq úkimet» portaldarynda jáne resmı ınternet-resýrsta júrgizetin jumysyn Aqparat jáne kommýnıkasııalar mınıstrligi memlekettik organdar qyzmetiniń tıimdiligin jyl saıyn baǵalaý sheńberinde baqylaıdy. 2017 jyly «Memlekettik organnyń ashyqtyǵy» baǵyty boıynsha Shyǵys Qazaqstan oblysynyń ákimdigi jáne Qazaqstan Respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttigi aldyńǵy qatardan kórindi.
Aqmaral AǴZAMQYZY,
«Egemen Qazaqstan»
