Memlekettik qyzmet isteri jáne sybaılas jemqorlyqqa qarsy is-qımyl agenttiginiń Batys Qazaqstan oblysy boıynsha departamenti Prezıdent janyndaǵy memlekettik basqarý akademııasynyń Batys Qazaqstan oblystyq fılıalymen birlesip talantty jastardy memlekettik qyzmetke tartý, kadr qoryn qalyptastyrý maqsatynda óńirde alǵash ret joǵary oqý oryndary túlekteri úshin Batys Qazaqstan oblysynyń memlekettik qyzmet mektebin ashty. Qazir jańa mektepke qabyldaý sharalary júrip jatyr.
Memlekettik qyzmet mektebi jas kóshbasshylardy oqytý, memlekettik organdarda taǵylymdamadan ótkizý arqyly memlekettik qyzmettiń is júzindegi daǵdylaryn úırenýge múmkindik beredi.
Atalǵan bastamaǵa oraı, jaqynda Jáńgir han atyndaǵy Batys Qazaqstan agrarlyq-tehnıkalyq ýnıversıteti, Mahambet О́temisuly atyndaǵy Batys Qazaqstan memlekettik ýnıversıteti, Batys Qazaqstan ınnovasııalyq-tehnologııalyq ýnıversıteti jáne Qazaqstan ınnovasıalyq jáne telekommýnıkasııalyq júıeler ýnıversıteti stýdentterimen kezdesý ótti. Kezdesýde memlekettik qyzmet mektebiniń mindetteri men maqsattary tanystyrylyp, testileý baǵdarlamasyna qajetti normatıvtik quqyqtyq aktilerdiń negizgi baǵyttary týraly aıtyldy.
– Oraldaǵy memlekettik qyzmet mektebine joǵary oqý oryndarynyń 4 kýrs stýdentteri ǵana qabyldanady. Maqsatymyz – keleshegin memlekettik qyzmetke arnaǵysy keletin jas mamannyń JOO dıplomymen birge memqyzmettiń talap-daǵdylaryn da qosa meńgerip shyǵýyna kómektesý, – deıdi Agenttiktiń Batys Qazaqstan oblysy boıynsha departament basshysynyń orynbasary Mırbolat Nurtazın.
Mırbolat Súıeýulynyń aıtýynsha, mektepte alǵan sabaq memlekettik qyzmettiń ımıdjin kóterip, jas mamandardy osy saladaǵy reformalarmen tanystyrady, naqty is-tájirıbege baǵyttalǵan kómek alady.
Aıta keteıik, Oraldaǵy memlekettik qyzmet mektebinde oqýǵa qazirdiń ózinde 50 shaqty joǵary kýrs stýdenti nıet bildiripti. Arnaıy synaqtan ótkennen keıin olardyń 30-35-i ǵana Qazaqstan Respýblıkasynyń Prezıdenti janyndaǵy memlekettik basqarý akademııasynyń Batys Qazaqstan oblystyq fılıalynda sheberlik sabaqtaryn alatyn bolady. Al mekteptiń tolyq kýrsynan ótken stýdentke qorytyndy sheshim berilmek. Bir qyzyǵy, bul sertıfıkat jas mamanǵa memlekettik qyzmetke kiretin test synaǵynda eshqandaı jeńildik bermeıdi. Basqalarmen qatar tolyq synaqtan ótedi.
Qazbek QUTTYMURATULY,
«Egemen Qazaqstan»
Batys Qazaqstan oblysy
