Naqtyraq aıtsaq, aımaq basshysynyń aýdandyq máslıhat depýtattary men jergilikti qaýymdastyq ókilderimen kezdesýinde sóz boldy.
Aýdandyq máslıhat depýtaty Larısa Grechýshnıkova 27 tamyzda Zyrıan aýdanynyń ákimi Nurjan Toqseıitovke jergilikti qaýymdastyq ókilderi aýdandy damytý jáne qala men aýdan atyn ózgertý jóninde usynys jibergenin aıtady. «Bul usynysty depýtattar korpýsy qoldap otyr. Qazir kezdesýler uıymdastyrylyp, qoǵamdyq pikirler zerttelýde, 28 qyrkúıekte «Gornıak» mádenıet úıinde qoǵamdyq tyńdaý ótedi», - deıdi ol.
Depýtattar jańa ataý aýdannyń jańa brendin qalyptastyryp, ınvestısııa tartýǵa, ekonomıkany damytýǵa tyń serpin beretinine senimdi. «Borodıno» sharýa qojalyǵynyń basshysy Qaırat Bókejanov Zyrıan aýdanynyń tabıǵaty tamasha bolǵanymen, ázirge týrızmdi órkendetýge tolyq jaǵdaı jasalmaı otyrǵanyn, jańa ataý osy salanyń aıaǵynan qaz turýyna septesetinin atap ótti. «Jastar da bul ıdeıany quptap otyr. Biz Altaı qalasynda, Altaı aýdanynda turǵymyz keledi», - deıdi aýdandyq jastar resýrstyq ortalyǵynyń jetekshisi Maıına Lısovsova.
Oblys ákimi Danıal Ahmetov kezdesýde aýdandyq depýtattar men jastardyń tarapynan aıtylǵan usynysty qoldaıtynyn jetkizdi. «Zyrıandy Altaı dep ataý barlyq janynan da kelip tur. Zyrıannyń turǵan jeri Altaı ekeni ras. Altaı - san túrli halyqtyń shyqqan jeri, atajurty. Sol sebepti, biz qandaı kıeli jerde turyp jatqanymyzdy eshqashan umytpaýymyz kerek. Bul - eń aldymen tarıhymyzǵa taǵzym. Aýdan atyn ózgertý ekonomıkalyq turǵydan da tıimdi bolary sózsiz. Nege deseńiz, Altaı – brendtyq ataý. Bul óńirge týrısterdi kóptep tartýǵa múmkindik beredi», - dedi aımaq basshysy.
Azamat QASYM,
«Egemen Qazaqstan»
Shyǵys Qazaqstan oblysy,
Zyrıan aýdany
