Búgin taǵy eki salmaq dárejesi boıynsha júldeler sarapqa salynady. 52 kılo salmaq dárejesinde bizdiń qyzdar kúresken joq. Sol sebepti de áıelder saıysynda ózge memleket ókilderiniń ónerin tamashalaýmen shekteldik. Al erler arasynda Erlan Serikjanov tatamıge shyqty. 66 kılo salmaqta baq synaǵan qandasymyz tusaýkeser kezdesýde Mozambıktiń balýany Artýr Djýnıor Karlospen kúresti. Álemdik reıtıngte 261 satyǵa jaıǵasqan qara qurlyq ókilin jeńý sol tizimde 36 orynda turǵan qandasymyzǵa esh qıyndyq týǵyzǵan joq.
Kelesi básekeni Barýh Shmaılovqa qarsy ótkizdi. Álemdik reıtıngte tórtinshi oryndy ıelenip otyrǵan Izraıl sportshysyna Erlan áýeli vazarı ádisin qoldansa, kóp uzamaı ony ıpponǵa túsirdi. Úshinshi kezeńde moldovalyq Vadım Býneskýdiń osal tusyn ońaı tapqan qazaq dzıýdoshysy shırek fınalda Herlen Gandboldpen beldesti. Álemdik reıtıngte besinshi oryndy ıemdenip turǵan Mońǵolııanyń balýany da óte azýly edi. Negizgi ýaqytta ekeýi teń túskenimen, qosymsha ýaqytta qazaqtyń uly qarsylasyn taza jeńdi. Sóıtip, Erlan Serikjanov jartylaı fınalǵa joldama aldy. Sátin salsa, Aıdar Qaıyrbaevtyń shákirti óz jerlesterin qýantady degen senimdemiz. Endi ol álem jáne Eýropa chempıonattarynyń qola júldegeri, ızraıldik Tal Flıkkermen kúsh synasady.
Erteń 73 kılo salmaqta Jansaı Smaǵulov pen Bekádil Sháımerdenovtyń ónerin tamashalaımyz. Ekeýi de alǵashqy aınalymda bos. Odan keıin Bekádil fransııalyq Benjamın Aksýspen kezdesedi. Ony jeńgen jaǵdaıda kolýmbııalyq Leıder Navarro, ıordanııalyq Salman Eıal Ieýnıs jáne shveısarııalyq Tımo Allemannyń birimen kúsh synasady. Jansaı perýlik Alonso Vong pen shveısarııalyq Nıl Stamp arasyndaǵy básekeniń jeńimpazymen kúsh synasady. Qandasymyz osy kezeńinen súrinbeı ótse, marokkolyq Safýan Boýtıt pen makedonııalyq Nıkola Kardashevıchpen aıqasady.
Al áıelder saıysynda 57 kılo salmaqtaǵy Sevara Nyshanbaevaǵa jankúıer bolamyz. Onyń alǵashqy aınalymdaǵy qarsylasy – bolgarııalyq Ivelına Ilıeva.
Ǵalym SÚLEIMEN,
«Egemen Qazaqstan»
