Sharaǵa «Qazaqstan» RTRK AQ Basqarma tóraǵasy Erlan Qarın, «Bilim-Innovasııa» halyqaralyq qoǵamdyq qorynyń prezıdenti Darhan О́te Ermahanuly jáne Mońǵolııanyń Baıan-О́lgıı aımaǵynda turatyn esimi álemge máshhúr qazaqtyń búrkitshi qyzy Aısholpan Nurǵaıypqyzy men anasy Almagúl Kóksegen qatysty.
Aısholpan Nurǵaıypqyzy «Qazaqstan» telearnasynyń tapsyrysymen jaryqqa shyǵatyn «Kóshpendiler» derekti fılminiń birinshi bólimine túsken bolatyn. Qyz balasyna tańsyqtaý osy bir qyzyqty kásipti serik etken arýdyń ádemi mashyǵy álem nazaryn ózine buǵan deıin de birneshe márte aýdartqan edi. Atap aıtar bolsaq, alǵash ret 2014 jyly aǵylshynnyń Daily Mail basylymy «Qazaqtyń salt-dástúrindegi asyl qundylyqtardyń biri - qusbegilik ónerdi ıgergen on úsh jasar jalǵyz qyz» atty maqala jarııalap, jahan nazaryn qazaq arýy Aısholpan Nurǵaıypqyzyna aýdartsa, 2016 jyly túsirilgen «Búrkitshi qyz» (The Eagle Huntress) atty rejısser Otto Belldiń derekti fılmi de boıjetken esimin álemge tanymal etti. Búgin, mine, ár elde turatyn qazaqtardyń ómiri men turmys-tirshiligindegi erekshelikterimen tanystyryp, ultymyzdyń salt-dástúrin dáripteýdi maqsat tutqan otandyq «Kóshpendiler» fılmi arqyly Aısholpan óneri endi týǵan halqymen qaýyshqaly otyr.
«Kóshpendiler» derekti fılminiń negizgi maqsaty kezinde shetelge qonys aýdaryp, sol jaqtarda turaqtap qalǵan qandastarymyzdyń ómiri men turmys-saltyn kópshilikke kórsetý. Derekti fılmder toptamasy 12 bólimnen turady. Osy jobany júzege asyrǵan otandasymyz, belgili rejısser Qanat Beısekeev. Fılm Mońǵolııa, Aýǵanstan, Qytaı, Túrkııa, Iran jáne t.b elderdi meken etken qazaqtardyń taǵdyry jaıly baıandaıdy. Iаǵnı, ár elde turatyn qazaqtardyń turmys-tirshiligi, erekshelikteri kórsetiledi. «Kóshpendiler» derekti fılmder toptamasy Ulttyq arnadan 14 qazannan bastap 23 jeltoqsanǵa deıin efırge shyǵatyn bolady. Sol fılmderdiń alǵashqysynyń keıipkeri ortamyzda otyrǵan Mońǵolııada turatyn qazaqtyń búrkitshi qyzy Aısholpan Nurǵaıypqyzy Qazaqstanǵa birinshi ret kelip otyr» – dedi Erlan Qarın.
Fılmniń keıipkerleri kadrdan tys mátinsiz, bastarynan ótkergen oqıǵalaryn, ata-babalarynyń tarıhyn baıandaıtyn bolady. Alǵashqy fılmde Mońǵolııada turatyn baýyrlarymyz atadan balaǵa mura bolyp kele jatqan salt-dástúrlerdi sóz etedi. Atamekennen jyraqta júrgen qandastarymyzdyń shynaıy ómiri kez kelgen kórermenniń qyzyǵýshylyǵyn oıatary sózsiz.
Nazerke JUMABAI,
«Egemen Qazaqstan»
