Saltanatty rásimge oblys ákimi Berdibek Saparbaev, oblystyq máslıhat hatshysy Sánııa Qaldyǵulova, Aqtóbe qalasynyń ákimi Ilııas Ispanov, sondaı-aq elimizdiń ár óńirinen kelgen belgili tulǵalar, atap aıtsaq, ánshi, Qazaq KSR jáne KSRO halyq artısi Bıbigúl Tólegenova, Sosıalıstik Eńbek Eri, Qazaq KSR-iniń eńbek sińirgen agronomy Vera Sıdorova, jazýshy, qoǵam qaıratkeri Altynshash Jaǵanova, aqyn, Qazaqstan Memlekettik syılyǵynyń laýreaty Marfýǵa Aıtqojına, Baýyrjan Momyshulynyń kelini Zeınep Ahmetova, Ábish Kekilbaevtyń zaıyby Klara Jumabaeva, akademık, bıologııa ǵylymynyń doktory Ajar Jubanova, medısına ǵylymynyń doktory, professor, Qazaqstan Ǵylym Akademııasynyń akademıgi Raısa Kózdenbaeva, t.b. qatysty.
Sharada oblys ákimi Berdibek Saparbaev jınalǵan jurtshylyqty jańa ortalyqtyń ashylýymen quttyqtady.
Qazaqta «Anańdy Mekkege arqalap aparsań da, onyń aldyndaǵy boryshyńdy óteı almaısyń» degen sóz bar. Sondyqtan biz, bárimiz, ana aldynda basymyzdy ıemiz, olardy máńgi qurmetteımiz.
Búgingi ashylyp otyrǵan ǵımarat — aqtóbelikterdiń analar aldyndaǵy boryshtaryn óteýge degen shynaıy tilegi men nıetiniń kórinisi. Bizdiń maqsatymyz — tarıhta ónegeli ómir súrgen, búgingi kúni elimizdiń damýyna súbeli úles qosqan analarǵa qurmet kórsetý, olarǵa taǵzym etý, ananyń adam ómirindegi orny erekshe ekenin, ananyń sútimen bizdiń boıymyzǵa qandaı qasıetter darıtynyn nasıhattaý, oblystaǵy qyz-kelinshekterimizdi sol batyr, dana analarymyzdyń ónegeli ómirinen úlgi alýǵa shaqyrý. Memleket basshysy Nursultan Nazarbaevtyń «Rýhanı jańǵyrý» baǵdarlamasyn jarııalaǵandaǵy eń negizgi maqsaty — ulttyq qundylyqtarymyzdy saqtaý, ulyqtaý, ósip kele jatqan urpaqtyń boıyna qazaqtyń salt-dástúrlerin, úrdisterin sińirý. Sondyqtan búgingi ashylyp otyrǵan ortalyqta bizdiń jastarymyz qazirgi zamannyń talabyna saı ozyq úlgilerdi úırenip, abzal analarymyzdyń ómirinen ónege alyp, abyroıly, bilimdi, ımandy bolyp ósetinine senemiz.
Barlyq aqtóbelikterdiń atynan Bıbigúl Ahmetqyzy bastap kelgen analarymyzǵa, apalarymyzǵa kóp raqmet aıtamyn. Sondaı-aq oblys basshylyǵy atynan osy ǵımarattyń salynýyna demeýshilik kórsetken barlyq kásipkerlerge rızashylyǵymdy bildiremin. Aqtóbede boı kóterip jatqan ortalyqtar, záýlim ǵımarattar osy demeýshilerdiń, kásiporyndardyń, kásipkerlerdiń qarjysyna salynyp jatyr.
Eń negizgisi, bárimizge ortaq búgingi qýanysh qutty bolsyn! Barlyq analarymyz, qyz-kelinshekterimiz aman bolsyn! Qazaq eliniń abyroıy arta bersin! — dedi oblys ákimi.
Budan keıin jazýshy, qoǵam qaıratkeri Altynshash Jaǵanova jınalǵandarǵa jyly lebizin bildirdi.Halqymnyń altyn ul-qyzdarynan aınalaıyn! Olardyń osyndaı jasaǵan bastamasyna, ıgilikti isine myń da bir raqmet! Mundaı ǵımaratty men álemde kezdestirgen joqpyn. Bul — búkil dúnıejúzine taratatyndaı keremet dúnıe. Bul analardyń ǵana ortalyǵy emes, ósip kele jatqan ul-qyzdarymyzǵa tárbıe beretin, ulttyq qundylyqtarymyzdy nasıhattaıtyn ortalyq dep sanaımyn. Sondyqtan osy ıgilikti isti jasaǵan azamattarǵa myń alǵys! Osy bastamanyń qasıetti Aqtóbe jerinen bastalyp otyrǵanynyń ózinde úlken mán bar. Bul ómirde anadan artyq qasıetti eshteńe joq! Sondyqtan endigi ýaqytta ár azamat óz anasyn esine alyp, taǵzym etýi úshin osy ortalyqqa kelýi kerek. Men oblys ákimi Berdibek Mashbekulyna osy ıdeıasy úshin, sondaı-aq ony qoldap, ǵımarattyń salynýyna úles qosqan isker azamattarǵa erekshe raqmetimdi aıtamyn. Uzaq, baqytty ómir súrsin dep tileımin! — dedi ol.
Sharada memleket jáne qoǵam qaıratkeri, jazýshy Ábish Kekilbaevtyń zaıyby Klara Jumabaeva júrekjardy tilegin jetkizdi.
Búgingi qýanyshtaryńyz qutty bolsyn! Bolashaq ósip kele jatqan urpaq osy jomart azamattardyń jasaǵan jaqsylyǵyn túsinetin bolsyn! Jas urpaq, sizderdiń aldaryńyzda kóp mindet tur. Osy aǵa-apalaryńnyń jasaǵan eńbegin ary qaraı jalǵastyryp, elimizdi kórkeıte berińizder! — dedi ol.
Saltanatty sharada ánshi, Qazaq KSR jáne KSRO halyq artısi Bıbigúl Tólegenova, Sosıalıstik Eńbek Eri, Qazaq KSR-iniń eńbek sińirgen agronomy Vera Sıdorova, aqyn, Qazaqstan Memlekettik syılyǵynyń laýreaty Marfýǵa Aıtqojına, Baýyrjan Momyshulynyń kelini Zeınep Ahmetova jańa ortalyqtyń lentasyn qıyp, oblys ákimi bastaǵan qurmetti qonaqtar ortalyqty aralap shyqty.
Budan keıin ortalyqtyń úlken zalynda oblys ákimi Berdibek Saparbaev, akademık, bıologııa ǵylymynyń doktory Ajar Jubanova jáne medısına ǵylymynyń doktory, professor, Qazaqstan ǵylym akademııasynyń akademıgi Raısa Kózdenbaeva bir top kópbalaly anaǵa «Altyn alqa» tósbelgisin tabystady.
Búginnen bastap osy zal árdaıym osy óńirden shyqqan, kóp bala ósirip, tárbıelegen analardy qurmetteıtin, marapattaıtyn zal bolady. Osy jerde batyr analarymyzǵa «Altyn alqa», «Kúmis alqa» tósbelgileri tabystalatyn bolady. Bıylǵy jyly oblysta kóp bala tárbıelegen, elimizge eńbek sińirgen analarǵa «Ana dańqy» tósbelgisi daıyndalyp jatyr.
О́zderińizge belgili, Elbasy Nursultan Nazarbaev elimizde analarǵa erekshe qurmet- qoshemet kórsetip keledi. Búgingi kúni ulan-baıtaq jerimiz Qazaqstanda 18 mıllıon adam turady, bul, árıne, az. Ol úshin halyqtyń sanyn kóbeıtýimiz kerek. Sondyqtan bılikte júrgen bizder analarǵa barlyq jaǵdaıdy jasaýymyz kerek. Búgingi bastama — sonyń bir aıǵaǵy, — dedi B.Saparbaev.
Shara sońynda Ajar Jubanova jınalǵandarǵa jyly lebizin bildirse, Raısa Kózdenbaeva oblysta medısına salasynyń qarqyndy damyp jatqanyn, al bul óz kezeginde ana men bala densaýlyǵyna, ult bolashaǵyna jasalyp jatqan úlken qoldaý ekenin atap ótti.
Saltanatty sharadan keıin ánshi, Qazaq KSR jáne KSRO halyq artısi Bıbigúl Tólegenova bastaǵan top «Analar» alleıasyna shyrsha otyrǵyzyp, kópshilikpen estelik sýretke tústi.
Búgin oblys ákimi Berdibek Mashbekulynyń bastamasymen oblys ortalyǵynda «Anaǵa taǵzym» ortalyǵy ashylyp otyr. Ortalyqta ónegeli ómir súrgen, erligimen este qalǵan tanymal áıelder, belgili tulǵalardyń analary týraly keń maǵlumat beretin murajaı, psıhologııalyq, keńes berý kabınetteri, qoldanbaly óner, mýzykalyq tárbıe berýge arnalǵan arnaıy bólmeler jasaqtalǵan. Jalpy «Anaǵa taǵzym» jobasy aıasynda oblys boıynsha 200-den astam adam, 300-ge jýyq kásiporyn, Muǵaljar, Shalqar aýdandarynyń óndiristik ujymdary óz esepshottarynan osy ortalyqtyń salynýyna qarjy aýdaryp, óz úlesterin qosty. Sonyń nátıjesinde búgin, mine, Aqtóbede osyndaı ádemi, záýlim ǵımarat ashylyp otyr. Biz óte qýanyshtymyz. Bul ortalyq tek analar ǵana emes, barlyq áıelder, qyz-kelinshekter bas qosatyn ortalyq bolmaq. Bul ortalyqtyń salynýyna 350 mıllıon teńge qarjy jumsalsa, onyń qurylysyn júrgizýge 10 myń adam úles qosty, — deıdi Aqtóbe qalasy ákiminiń orynbasary Kúlparshyn Aıdarhanova.
Aıta ketý kerek, atalǵan ǵımarattyń qurylysyn merdiger uıym «ESAT» JShS júrgizse, jobalaýshy uıym — «RegıonStroıProekt» JShS.
Úsh qabatty ǵımaratta «Ana dańqy» mýzeı-galereıasy, mýltımedııalyq ekspozısııa zaly, horeografııa zaly, sondaı-aq biryńǵaı taqyryptyq kabınetter ornalasqan.
Danagúl QAZIHAN
