Qazaqstan Prezıdentiniń Túrkııaǵa resmı sapary jáne Ankarada ótken Qazaqstan-Túrkııa ınvestısııalyq forýmy týraly keńinen aqparat qamtylǵan jýrnalǵa Túrkııa Respýblıkasynyń 11-shi Prezıdenti Abdolla Gúldiń «Astana N.Nazarbaevtyń strategııalyq kózqarasy arqyly bas qala bolyp qalyptasty», Túrkııanyń Syrtqy ister mınıstri Mevlıýt Chavýshoǵlýnyń «Túrik kásipkerleri salǵan ǵımarattar Qazaqstandy gúldendirip otyr», Qazaqstannyń Investısııa jáne damý mınıstri Jeńis Qasymbektiń «Trans-Kaspıı baǵyty arqyly eki el arasyndaǵy saýda damı túsedi», Qazaqstannyń Túrkııadaǵy Elshisi Abzal Saparbekulynyń «Ortalyq Azııaǵa arnalǵan sheteldik ınvestısııalardyń basym bóligi Qazaqstanǵa salyndy» atty maqalalary endi.
Sonymen qatar, 100 myń tırajben Qazaqstannyń Túrkııadaǵy elshiliginiń qoldaýymen basylǵan jýrnalda «Qazaq Invest» Ulttyq kompanııasynyń basqarma tóraǵasy S.Tuıaqbaevtyń, Astana qalasynyń burynǵy ákimi Á.Esekeshevtiń, Túrkistan oblysynyń ákimi J.Túımebaevtyń, Almaty oblysynyń ákimi A.Batalovtyń, Soltústik Qazaqstan oblysynyń ákimi Q.Aqsaqalovtyń, Aqtóbe oblysynyń ákimi B.Saparbaevtyń, Pavlodar oblysynyń ákimi B.Baqaýovtyń, Batys Qazaqstan oblysynyń ákimi A.Kúlginovtiń, Qaraǵandy oblysynyń ákimi E.Qoshanovtyń, Shymkent qalasynyń ákimi Ǵ.Ábdirahımovtyń, Mańǵystaý oblysynyń ákimi E.Toǵjanovtyń Qazaqstannyń óńirlik ekonomıkalyq áleýeti men ınvestısııalyq múmkindikteri týraly kólemdi maqalalary jaryq kórdi.
Shyǵys Qazaqstan oblysy, Jambyl oblysy, Qostanaı oblysy men Aqmola oblysynyń sheteldik ınvestısııa tartý múmkindikteri týraly aqparattar men atalǵan óńirlerdiń qazirgi tańdaǵy damý kórsetkishteri jarııalanǵan basylymda «Báıterek» holdınginiń basqarma tóraǵasy A.Áriphanovtyń, «Taý-Ken Samuryq» ulttyq kompanııasynyń basqarama tóraǵasy Q.Qudaıbergenniń, «Damý» qorynyń basqarama tóraǵasy A.Sarqulovtyń, «QazGeologııa» zertteý kompanııasynyń basqarma tóraǵasy Ǵ.Nurjanovtyń maqalalary men Qazaqstannyń saýda-ekonomıkalyq damýyna úles qosqan túrik kásipkerleriniń qyzyqty estelikteri men tolǵanystary da jarııalandy.
Eske sala keteıik, «Dúnııa» gazeti 1 naýryz 1952 jyldan bastap Ystanbul qalasynda shyǵady. Basylymnyń alǵashqy redaktory belgili jýrnalıst Fatıh Ryfky Ataı bolatyn. Qazirgi tańda «Dúnııa» gazeti «Dúnııa» kompanııalar toby tarapynan shyǵarylady.
