Fınalda óńirlik irikteýlerden ótken 10 qatysýshy alǵash ret myńdaǵan kórermenniń aldynda án aıtady. Maııa Bekbaeva, Nursultan Qurman, Marat Oralǵazın jáne Erkebulan Myrzabek júrgizetin kesh barysynda ónerpaz balalardyń ónerin ádilqazylar alqasy da baǵalaıdy. Degenmen, jeńimpaz kórermender men ádilqazylardyń ortaq sheshimi negizinde anyqtalatyn bolady. Al ádilqazylar quramynda tanymal kásibı ánshiler men prodıýserler Roza Rymbaeva, Meırambek Bespaev, Tamara Asar, Baǵym Muhıtdenova, Erke Esmahan, Qaırat Nurtas, Renat Ǵaısın, Láılá Sultanqyzy, Mádına Sádýaqasova jáne Dımash Qudaıbergen bar.
«Balalar Evrovıdenıesi» baıqaýyna respýblıkalyq irikteý fınalynyń gala konserti «Habar» telearnasynda tikeleı efırde keshki saǵat 18.30-20.00 aralyǵynda bolady. Odan keıin 30 mınýt daýys berý sharasy ótedi. Al saǵat 20.55-te tikeleı efırde jeńimpazdyń esimi jarııa etiledi.
Aıta keteıik, «Junior Eurovision Song Contest» halyqaralyq án baıqaýy alǵash ret 2003 jyly Kopengagende (Danııa) 16 eldiń qatysýshysy arasynda ótti. Telekórermender men qazylar alqasynyń jeńimpazdy birlesip anyqtaýy 2008 jyldan bastap engizildi. Oǵan deıin kórermender tikeleı kórsetilim kezinde daýys beretin. Ár jyldary Belgııa, Rýmynııa, Nıderlandy, Kıpr, Ýkraına jáne t.b. elder uıymdasty boldy. Al Reseı, Grýzııa, Belarýs jáne Malta eki ret jeńiske jetti. 2017 jylǵy Tbılısıde ótken baıqaýda «Wings» ánimen reseılik 14 jastaǵy Polına Bogýsevıch jeńimpaz atandy.
Bıyl baıqaýǵa 19 el qatysady. Olardyń qatarynda Albanııa, Armenııa, Avstralııa, Ázerbaıjan, Belarýs, Fransııa, Makedonııa, Grýzııa, Irlandııa, Izraıl, Italııa, Qazaqstan, Malta, Polsha, Portýgalııa, Reseı, Serbııa, Nıderlandy, Ýels bar. Qazaqstan men Ýels bul baıqaýǵa alǵash ret qatysady.
