Qostanaı oblystyq ishki ister departamentiniń quramynda aǵa serjanttar Sársenbaı Nurmaǵambetov pen Ybyraı Raqymǵalıev bar jol-patrýldik batalonynyń avtopatrýli túngi saǵat 22.00-de Altynsarın aýdanynyń Zýevka poselkesiniń tusynda jol jıeginde toqtap turǵan mashınany baıqady. Tártip saqshylary kóliktiń mezgilsiz toqtaýynyń sebebin bilý úshin dereý jetti. Kólik júrgizýshisi Denıs Tarasov salonda aýyr halde 53 jastaǵy anasynyń otyrǵanyn habarlady. Áıeldi jedel aýrýhanaǵa salý kerek bolatyn.
Polıseıler Tarasovtyń mashınasyn jol erejesine syıymdy tásildermen túrli-tústi shamdaryn jaǵyp, kedergisiz júrý belgi bere otyryp, shuǵyl oblystyq aýrýhanaǵa jetkizdi. Eger polıseıler shuǵyl shara qoldanbaǵanda áıeldiń jaǵdaıy tym qıyndaıtyn edi, oǵan aýrýhanada jedel járdem kórsetilip, em ala bastady.
«Polıseılerge de, dárigerlerge de aıtar alǵysym sheksiz. Polıseıler anamdy der ýaqytynda aýrýhanaǵa jetkizýge kómektesti.Talma aýrýynda ár mınýt qymbat ekenin anama da, maǵan da belgili edi» deıdi Denıs.
Sársenbaı Nurmaǵambetov pen Ybyraı Raqymǵalıev jol boıynda adamdarǵa mundaı kómekti kún saıyn kórsetedi. Qys aılarynda qarǵa ombyǵyp qalǵan mashınalardy shyǵaryp jiberedi, jaryqtaryn jóndeıdi, júrgizýshiler men jolaýshylardy jylytyp, úsip ketýden saqtaıdy. Al jaz aılarynda synyp, tún ishinde turyp qalǵan kólikter jıi kezdesedi.
Názıra JÁRIMBET,
«Egemen Qazaqstan»
Qostanaı
