Týrın ýnıversıtetiniń aýmaǵynda ótken rásimge Halyqaralyq stýdentter sportynyń prezıdenti (FISU) Oleg Matysın men Týrın qalasynyń meri Kıara Appendıno bastaǵan bir top laýazym ıeleri jáne de osy salanyń basy-qasynda júrgen azamattar qatysty. Mine, sol saltanatty shara búgin Alataý bókterinde óz jalǵasyn tapty. Alqyzyl alaýdy ustaýshylar Almatydaǵy Abaı dańǵylynyń boıymen Balýan Sholaq atyndaǵy sport saraıynan bastap, Respýblıka saraıyna deıin júgirip ótti. Olardyń qatarynda FISU prezıdenti Oleg Matysın, otandyq stýdenttik sport odaǵynyń basshysy Kaırat Zakırıanov, boksshy Qanat Islam, fýtzalshy Dinmuhambet Súleımenov, bıatlonshy Vasılıı Podkorytov jáne basqa da tanymal sport qaıratkerleri, Joǵary oqý oryndarynyń rektorlary, belgili sportshylar boldy.
Endi arada eki kún ótkennen soń saltanatty sherý Qytaıdyń Harbın qalasynda jalǵasady. Al 29 qyrkúıekte alaý Reseıge jetkiziledi. Sol kúnnen bastap, kelesi jyldyń 1 naýryzyna deıin jalǵasatyn alaý estafetasy atalmysh eldiń 30 qalasyn aralap, aqyrynda XXIX Dúnıejúzilik qysqy Ýnıversıadasynyń astanasy – Krasnoıarskini betke alady.
Ǵalym SÚLEIMEN,
«Egemen Qazaqstan»
ALMATY
