Qostanaıdaǵy Maral ıshan atyndaǵy aq meshit oblystaǵy mádenı mura, sakraldy oryndardyń biri bolyp sanalady. Salynǵanyna 125 jyl bolǵan meshit qazir tozyp, jóndeýdi qajet etip tur. Qostanaı qalasynda osydan bir jarym jyl buryn 3 myń adam sııatyn jańa meshittiń paıdalanýǵa berilýine baılanysty ári jóndeýdi qajet etkendikten eski meshit jumysyn toqtatqan bolatyn. Qostanaı qalasynda qazir eki jańa meshit jumys istep tur. Bul týraly jurtshylyq tarapynan da, keıbir buqaralyq aqparat quraldarynda da «Maral ıshan atyndaǵy meshit ǵımaraty endi dinı oryn bolmaıdy eken» degen qańqý áńgimeler shyǵa bastaǵan. Oblys ákimi Arhımed Muhambetov apparattyń keńeıtilgen májilisinde meshitke baılanysty jaǵdaıdyń anyq-qanyǵyn aıtty.
«Qostanaıdaǵy Maral ıshan atyndaǵy eski meshit jóndeýdi qajet etedi. Biz osy ýaqytqa deıin oǵan jóndeý júrgize almadyq, sebebi ol Qazaqstan musylmandary dinı basqarmasyna qarasty boldy. Dinı basqarma ony bir jyl boıyna Qostanaı oblysynyń kommýnaldyq menshigine berdi, jumys úderisi osy ýaqytqa deıin sozyldy. Endi oǵan qarjy taýyp, jóndeý jumysyn bastaımyz. Aldymen jóndeý-smetalyq qujattary daıyndalady. Kelesi jyldyń aıaǵyna deıin jóndeý jumystary aıaqtalyp, ǵımarat jańarady. Biraq ony keleshekte qandaı maqsatqa paıdalaný kereigin biz Qazaqstan musylmandary dinı basqarmasymen kelise otyryp sheshetin bolamyz» dedi Arhımed Begejanuly.
Oblys ákimi áleýmettik máseleler jónindegi orynbasaryna meshitti jóndeý jumystarynyń «jol kartasyn» jasap, qandaı jumystar júrgiziletinin búge-shigesine deıin anyqtaýdy, ony júrgizý josparyn jasaýdy tapsyrdy.
Názıra JÁRIMBET,
«Egemen Qazaqstan»
Qostanaı
