Qoǵamdyq keńes músheleri otyrys barysynda tórt negizgi máseleni talqyǵa saldy. Onyń alǵashqysy, qala men aýyldaǵy telefon baılanysyn damytýdyń ózekti máselelerine arnaldy. Qoǵamdyq keńestiń múshesi Dýlat Orazalınov taqyryp boıynsha baıandama jasap, qazirgi tańda tutas Qazaqstandy sapaly baılanyspen qamtamasyz etýdiń joldarymen tanystyryp ótti. Onyń aıtýynsha, Qazaqstanda mobıldi baılanys salasyndaǵy keńjolaqty ınternetke qoljetimdilik 2015 jyldan beri kúrt artqan. Ásirese elimizdegi qala turǵyndarynyń LTE baılanys júıesi engizilgeli beri ǵalamtorǵa qoljetimdiligi artsa, aýyldar men aýdandyq ortalyqtar odan kenjeleý qaldy. Sebebi aýdan ortalyqtarynda arnaıy tehnıkalar az.
Sonymen birge aýyldar men qala turǵyndary arasynda stasıonarlyq telefonnan bas tartyp, uıaly baılanys telefondaryna kóshýshiler sany kóbeıýde. «Búginde Qazaqstannyń 4 prosent halqyn eseptemegende, elimizdiń barlyq turǵyndary 2 G deńgeıinde uıaly baılanys jelisimen tolyq qamtylǵan. Elimizdiń uıaly baılanys operatorlary halyq sany myńnan asatyn aýyldarǵa baılanys ornatyp, 2020 jylǵa deıin 500-den asatyn turǵyny bar aýyldarǵa baılanys jelisin ornatýǵa mindetteme alǵan. Bul turǵyndar sany óte az aýyldarǵa da 2 G deńgeıli uıaly baılanys keledi degen sóz. Áýel basta aýyldarǵa baılanys ornatýshy uıaly baılanys operatorlary shyǵynǵa ushyrady. Sol sebepti 2004 jyldan bastap baılanystyń osy túrin sýbsıdııalaý týraly arnaıy zańnama qabyldandy. Búgingi tańda qabyldanǵan shara ózine artylǵan júkti tolyqqandy ótep, iri aýyldardaǵy sýbsıdııalaýdy toqtatýǵa bolatyndyǵyn, sonymen birge uıaly baılanys operatorlarynyń arasynda erkin básekelestik júrgizý múmkin ekendigin kórsetip otyr. Alaıda turǵyndar sany óte az, 50-100 shaqty adamnan quralatyn aýyldarda baılanys joq. Bolǵan kúnniń ózinde olarda uıaly baılanys operatorlary arasynda básekelestik bolýy múmkin emes. Sondyqtan sýbsıdııalaýdy toqtatý múmkin emes», dedi D.Orazalınov.
Qoǵamdyq keńes otyrysy barysynda 1414 Biryńǵaı baılanys ortalyǵynyń qyzmeti týraly, sonymen qatar ashyq úkimetti damytý, onyń ishinde azamattardy ashyq úkimetti qalyptastyrýǵa tartý máseleleri, mınıstrliktiń ádep jónindegi ýákiliniń qyzmeti týraly sóz boldy.
Venera TÚGELBAI,
«Egemen Qazaqstan»
