Astana qalalyq departamentiniń jetekshisi Jazıra Jylqyshıevanyń aıtýynsha, qazirgi kezde memlekettik qyzmetshilerdiń eńbekaqysy tek eki parametrge - jumys ótili men atqaratyn laýazym sanatyna ǵana negizdelgen. Alaıda, atqarylatyn jumystyń qıyndyǵy men qyzmetkerdiń tıimdiligi eskerilmeıdi. Al syıaqylar men ústemeaqylar bárine birdeı kólemde tólenedi.
- Bul júıe 14 jyl buryn engizilgen bolatyn. Sonyń saldarynan ortalyq jáne aımaqtyq, memlekettik jáne jeke sektor qyzmetshileri arasynda eńbekaqy tóleminde teńsizdikter týyndady. Jalaqy tóleýdiń jańa júıesi atalǵan kemshilikterdi joıýdy kózdeıdi, - dedi J.Jylqyshıeva Astanada ótken baspasóz máslıxatynda.
Onyń aıtýynsha, pılottyq joba ortalyq jáne jergilikti memlekettik organ qyzmetshileriniń jalaqylaryn teńestirýge múmkindik berip otyr. «Mysaly, buryn Astana qalasy ákimdiginiń bas mamany mınıstrlikte otyrǵan bas sarapshydan ortasha eseppen aı saıyn 70 prosentke az jalaqy alatyn. Ol - shamamen 115 myń teńge. Qazirgi kezde ondaı aıyrmashylyq 10 prosentti quraıdy. Ákimdiktiń bas sarapshysy 210 myń teńge alady. Sonyń arqasynda Astana qalasynyń jergilikti atqarýshy organdarynda kadrlardyń ketýi eki esege azaıdy. Bıylǵy 8 aıda tek 16 adam jumystan ketti. Bos orynǵa konkýrstar 7 ese ósti. Buryn bir bos jumys ornyna eki-aq úmitkerden tirkelse, endi olardyń sany jıyrma adamǵa jetti», - dep atap kórsetti J.Jylqyshıeva.
Jańa júıeniń taǵy bir ereksheligi - jumys tájirıbesin esepteýdiń tyń tártibi. Buryn jalpy memlekettik qyzmet ótili eskeriletin bolsa, endigi jerde uqsas laýazymdar boıynsha fýnksıonaldyq baǵyttardaǵy tájirıbesi eskeriledi. Máselen, keńse bas mamany basqa memlekkettik organǵa aýyssa, jańa jumys ornynda onyń laýazymdyq tájirıbesi eskeriletin bolady. Budan bólek, bolashaqta joǵarylatý kezinde jalaqyny belgilegende tómen turǵan laýazymdaǵy jumys ótili de eskeriledi. Ondaı tásilderdi EYDU ozyq elderi (Fransııa, Germanııa, AQSh) qoldanady.
