Bul jobanyń júzege asýyna «Nur Otan» partııasy qoldaý kórsetken edi. Soǵan oraı keshe velomarafon qatysýshylary partııa Tóraǵasynyń birinshi orynbasary Máýlen Áshimbaevpen kezdesti. Bes myń shaqyrym jol, 6 memleket jáne 30 qala. Osynshama qashyqtyqty baǵyndyrǵan velomarafonshylar Qazaqstan, Reseı, Belarýs, Polsha, Germanııa, Fransııa elderin basyp ótti.
Bul joba óziniń qatysýshylarymen erekshe. Sebebi olar osyndaı batyl qadam arqyly qoǵamnyń múmkindigi shekteýli jandarǵa degen kózqarasyn ózgertýdi jáne óz boılaryndaǵy kúdik pen kúmándi jeńýdi aldaryna basty maqsat etip qoıǵan. Velomarafon barysynda qatysýshylar kúnine 100-200 shaqyrym jol júrip otyrǵan. Zaǵıp jandar negizinen ekikisilik velosıpedte stokerdiń (artqy oryndyqta otyryp júrgizetin velosıpedshi) mindetin atqarǵan. Al pılottyń rólin eriktiler atqardy. Soǵan baılanysty olarǵa negizinen joldy baǵdarlaý, velosıpedti basqarý sııaqty mindetter júktelse, basty kúsh stokerlerge túsken. Sondyqtan múmkindigi shekteýli jandardyń bul áreketin batyldyqqa balaýǵa tolyq negiz bar.
M.Áshimbaev sportshylardy marafonnyń sátti aıaqtalýymen quttyqtap, bul bastama elimizdi álemge tanytýǵa, Qazaqstanda paralımpıadalyq sport túrleriniń damýyna jáne múmkindigi shekteýli jandar arasynda salamatty ómir saltyn nasıhattaýǵa úlken úlesin qosatyn ıgi is ekenin aıtty.
– Qatarynan 3 jyl boıy ótkizilip kele jatqan velomarafonǵa bıyl «Nur Otan» partııasy da qoldaý kórsetip, onyń tabysty júzege asyrylýyna atsalysty. Sonyń nátıjesinde joba qurlyqaralyq deńgeıge kóterilip, qatysýshylar Eýropanyń 6 memleketi men 30 qalasyn basyp ótti. Osy joldaǵy sizderdiń qajyr-qaırattaryńyz, ómirge degen qushtarlyqtaryńyz ben jeńiske degen qulshynystaryńyz, tózimdilikterińiz ben tabandylyqtaryńyz jáne erik-jigerińiz – barsha halyqqa, ásirese jastarǵa úlgi bolatyn ónegeli is. Halyq ózderińizdeı rýhy myqty jandardy qashanda qurmet tutyp, maqtan etedi. Aldaǵy ýaqytta da partııa osyndaı ıgi bastamalarǵa qoldaý kórsetý isin jalǵastyra beredi, – dedi M.Áshimbaev.
Sondaı-aq ol partııa qyzmetin jańǵyrtý aıasynda qaıta jandanǵan «Kedergisiz keleshek» partııalyq jobasyna da toqtalyp ótti.
– Búginde partııa múmkindigi shekteýli jandarǵa qoldaý kórsetý maqsatynda «Kedergisiz keleshek» jobasyn júıeli júzege asyryp keledi. Bul joba partııa qyzmetin jańǵyrtý aıasynda jandanyp, jańasha qarqyn aldy. Sonyń nátıjesinde naqty basymdyqtar anyqtaldy. Iаǵnı, múmkindigi shekteýli jandarǵa arnalǵan kedergisiz orta qalyptastyrý, olardyń ınklıýzıvti bilim alýlaryna yqpal etý, jumysqa ornalasýlaryna qoldaý kórsetý jáne osy salaǵa qatysty zańnamalardy odan ári jetildirýge aıryqsha kóńil bólip otyrmyz. Sondaı-aq partııa elimizdegi saıası ómirge belsene aralasyp, máslıhat, Májilis saılaýlaryna qatysqysy keletin múmkindigi shekteýli jandarǵa da qoldaý kórsetýge daıyn, – dedi «Nur Otan» partııasy Tóraǵasynyń birinshi orynbasary.
Velomarafonnyń uıymdastyrýshysy, «Sportta shekara joq» jobasynyń jetekshisi Baqtııar Bazarbekovtiń aıtýynsha, bul sharanyń maqsaty – salamatty ómir saltyn jáne tabıǵı taza kólik túri sanalatyn velosıpedti nasıhattaý, sondaı-aq ekotýrızmdi damytyp, múmkindigi shekteýli jandardyń sportpen shuǵyldanýyna jaǵdaı jasaý.
Osy rette bul – atalǵan toptyń úshinshi iri velosherýi ekenin atap ótken jón. Alǵashqy ekeýi Almaty – Astana jáne Almaty – Ystyqkól baǵyttary boıynsha ótken edi. Velomarafon kezinde komanda quramy 17 adamnan turdy. Onyń ishinde 6 stoker (kózi múldem kórmeıtin jáne nashar kóretin jandar), 6 pılot (velotandemde jol nusqaýshy eriktiler) jáne 5 erikti (operator, júrgizýshi, aspaz, medısına qyzmetkeri) boldy. Olar 5 eki kisilik jáne 2 bir kisilik velosıpedpen júrip otyrdy.
Joldybaı BAZAR,
«Egemen Qazaqstan»
