Degenmen de, biz 1 qazanda 100 prosent daıyn bolýǵa tıispiz. Bilim, densaýlyq nysandarynda kómir jetkilikti. Qarajat bólingen. Ákimdikter qadaǵalap otyr. Sýyq tússe, kez kelgen ýaqytta jylýdy qosýǵa daıarmyz», degen edi. Alaıda bul málimetterdiń shyndyqqa janaspaıtyny «Nur Otan» partııasy oblystyq fılıalynyń Saıası keńes bıýrosynda belgili boldy. Eń aldymen, baıandama jasaǵan basqarma basshysy sózin jap-jaqsy derektermen tuzdyqtap, óńirdiń jylý júıeleri qys maýsymyna 95,6, sýmen qamtý jáne aryq júıeleri 94, al bıýdjettik saladaǵy mekemeler 97 prosent daıyn ekendigin (densaýlyq saqtaý nysandary – 96,1, bilim nysandary – 96, áleýmettik nysandar – 100 %) jetkizgen.
Alaıda odan keıin baıandama jasaǵan oblys ákiminiń orynbasary Serik Aqtanovtyń aımaqtyń jylý maýsymyna daıyndyǵyna baılanysty esebi ózgeshe bolyp shyqty. О́ńir basshysynyń kommýnaldyq sharýashylyqqa jaýapty orynbasary 5 qyrkúıektegi jaǵdaı boıynsha Rıdder qalasy men Borodýlıha jáne Ulan aýdandaryndaǵy bilim nysandaryna kómir jetkizilmegenin, Tarbaǵataı aýdanyn kómirmen qamtý kórsetkishi nebári 13 prosentti quraǵanyn, sol ýaqytta Semeı qalasy men Glýbokoe aýdanynyń densaýlyq nysandary – 37, Kókpekti aýdany qatty otynmen 44 prosent qamtylǵanyn, al halyqqa kómir jetkizý Kúrshim men Zaısan aýdandarynda – 30, Semeıde 31 prosentten aspaı otyrǵanyn málimdedi. Jáne buǵan oblystyq energetıka jáne turǵyn-úı kommýnaldyq sharýashylyǵy basqarmasy men keıbir qala-aýdan ákimderiniń óz jumysyna salǵyrttyq tanytqany sebep bolǵandyǵyn da jasyrmaı aıtty.
Oblys ákimi orynbasarynyń keltirgen derekterin Besqaraǵaı aýdanynyń ákimi Dáýlet Batyrbaev ta shegeleı túsip, aýdandaǵy bilim nysandary kómirmen bar bolǵany 25 prosentke qamtylǵanyn tilge tıek etti. Bul olqylyqty jıyndy júrgizip otyrǵan «Nur Otan» partııasy oblystyq fılıalynyń tóraǵasy, oblys ákimi Danıal Ahmetov qatty synǵa aldy. «Energetıka basqarmasy men ákimderdiń derekteri bir-birine sáıkes kelmeıdi. Bul basqarmanyń bizge jalǵan málimetter berip otyrǵandyǵyn kórsetedi», degen oblys ákimi energetıka jáne turǵyn-úı kommýnaldyq sharýashylyǵy basqarmasynyń basshysy Murat Musataevqa partııalyq qatań sógis jarııalanatynyn jetkizdi.
Azamat QASYM,
«Egemen Qazaqstan»
О́SKEMEN
