Sýretterdi túsirgen Erlan OMAR
Jıyndy Aqparat jáne kommýnıkasııalar mınıstri Dáýren Abaev ashty.
«Elbasy Nursultan Nazarbaev otandyq medıa salasyn damytýǵa árdaıym aıryqsha kóńil bólip otyrady. Osymen ekinshi ret ótip otyrǵan Astana Media Week elimizde ǵana emes, aımaqta da medıa naryqty qalyptastyrýǵa jáne odan ary damytýǵa serpin beredi dep senemin. О́ıtkeni elordamyzdyń tórinde qazaqstandyq buqaralyq aqparat quraldary ókilderinen bólek, sheteldik áriptester de óz oılaryn ortaǵa salady. Bul sharanyń negizgi maqsaty - otandyq medıa naryqty jan-jaqty damytý ǵana emes, mádenı jáne aqparattyq baılanystardy da tereńdetý. Baılanysy myqty memlekettiń qorǵanysy da qýatty», dedi D.Abaev aptalyqtyń saltanatty ashylý rásiminde.
Mınıstr quttyqtaý sózinen keıin «Kontent-Market» dep atalatyn kórme holyn aralady. Munda qazaqstandyq jáne sheteldik telearnalar men prodakshn kompanııalardyń ónimderi tanystyryldy.
Atalǵan sharaǵa otandyq jáne sheteldik medıaındýstrııanyń 60 top-menedjeri men 50-den asa prodakshn kompanııalar qatysyp jatyr. Jıyn barysynda medıa salasynda kezdesetin problemalar talqylanyp, túrli usynys-pikirler aıtylady.
«Astana Media Week» medıa-aptalyǵy 3 kúnge sozylady. Ár kúni medıa salasyndaǵy seriktestik qatynastar men halyqaralyq yntymaqtastyqtyń damýyna eleýli úles qosatyn túrli baǵyttaǵy sharalar josparlanǵan. Búgingi sharaǵa respýblıkalyq jáne óńirlik telearnalar, elimizdiń barlyq óńirlerindegi prodakshn-kompanııalar, jetekshi vendıngtik kompanııalar qatysty. Jańa telebaǵdarlamalardyń, realıtı-shoýlardyń, mýltfılmderdiń, kórkem fılmder men derekti fılmderdiń tusaýkeseri retinde pıtchıng júrgiziledi. Qazaqstan medıasynyń birinshi basshylarymen tet-a-tet kezdesý barysynda prodakshn-stýdııalar ózderiniń aıryqsha beıne kontentterin usynady. Mundaı formattaǵy tıimdi qatynas medıa naryqtyń zamanaýı damýynyń eń ózekti máseleleriniń túıinin tabady dep josparlanýda.
Medıaaptanyń ekinshi kúninde jańa konvergentti formalarǵa ótý kezindegi qıyndyqtar men múmkindikterdi talqylaý maqsatynda Qazaqstan buqaralyq aqparat quraldarynyń óńirlik Forýmyn ótkizedi. Sondaı-aq otandyq mass-medıa qyzmetine qatysty zańnama salasyndaǵy reformalar talqylanady.
Al úshinshi kúni «Select Communication Group» kompanııasynyń uıymdastyrýymen Astana Digital forýmy ótedi. Bul kúni sandyq marketıng quraldary, krıptovalıýta naryǵy sekildi taqyryptarda halyqaralyq deńgeıdegi spıkerler sóz sóıleıdi.
Marjan TILEÝBEK,
«Egemen Qazaqstan»
