Iýrıı Ilınniń aıtýynsha, bıylǵy shomylý maýsymy bastalǵannan beri IIM oblys ákimdikterimen jáne múddeli organdarmen tyǵyz jumys jasaı otyryp, tájirıbelik jáne profılaktıkalyq is-sharalar keshenin júrgizgen. Sý aıdyndarynyń qaýipti jáne kúzetilmeıtin ýchaskelerinde (dala jaǵajaılary) qutqarýshylar Tótenshe jaǵdaılar komıteti mobıldi qutqarý beketterin uıymdastyryp, shomylýǵa tyıym salynǵan jerlerdi belgilegen. Sonymen qatar bul jerlerde tyıym salý jáne eskertý belgileri ornatylǵan.
Bıylǵy sýǵa shomylý maýsymy kezeńinde 8 myńnan astam reıd júrgizilip, ishimdik ishken jáne ortaq sý paıdalaný qaǵıdalaryn buzǵan 2,5 myń azamat ákimshilik jaýapkershilikke tartylǵan.
Iýrıı Ilın qabyldanyp jatqan sharalarǵa qaramastan, shomylýǵa arnalmaǵan sý aıdyndarynda azamattardyń qaza bolý faktileri kezdeskenine toqtalyp ótti. Olardyń 85 prosenti sýǵa shomylý maýsymynyń basynda tirkelgen. Bul rette aıta keter jaıt, keıbir azamattardyń óz ómirine salǵyrt qaraýy.
Jalpy, qaza bolýdyń negizgi sebepteri kóp. Olardyń qatarynda qatty aǵys, aıaq-qoldyń qurysýy, balyq aýlaý kezinde erejelerdi saqtamaý, mas kúıinde shomylý, júze bilmeý, balalardyń úlkenderdiń baqylaýynsyz sýǵa túsýi sııaqty sebepter bar. Azamattar óliminiń basym bóligi sýǵa túsýge jaǵdaı jasalmaǵan oryndarda tirkelgen.
2018 jyly órt qaýpi týyndaıtyn kezeńde aldyn alý sharalarynyń nátıjesinde orman órti 38 prosentke, al dala órti 3 ese azaıǵan. Qaýipti kezeń bastalǵannan bastap, barlyq orman alqaptarynda jeke tulǵalardyń kelýine jáne kólik quraldarynyń kirýine shekteý qoıý boıynsha jalpy sany 325 mobıldi top qurylyp, olar 2 myńǵa jýyq reıd júrgizgen. Sonyń nátıjesinde 177 tulǵa ákimshilik jaýapkershilikke tartylǵan.
2018-2019 jyldary jylý berý kezeńinde órt sanyn azaıtý maqsatynda azamattyq qorǵaý organdary is-sharalar josparyn bekitken. Máselen, 15 qyrkúıekten bastap órt qaýipsizdigi aılyǵy bastaldy. Bul aılyq sheńberinde komıtettiń aýmaqtyq bólimsheleriniń ınjenerlik-ınspektorlyq quramy jergilikti turǵyndarmen jylý berý maýsymynyń aıaqtalýyna deıin josparly jumysyn júrgize bermek.
Venera TÚGELBAI,
«Egemen Qazaqstan»
