Nıý-Djersı shtatyndaǵy Atlantık-Sıtı qalasynda ótetin boks keshinde Krıstına Hammer amerıkalyq Klarresa Shıldspen judyryqtasady. Qazirgi kezde ekeýi de orta salmaq dárejesi boıynsha álem chempıony ataqtaryn ıelenip otyr. Germanııalyq sportshy WBC pen WBO nusqasy boıynsha teńdessiz dep tanylsa, AQSh-tyń ókili WBA (Super) men IBF nusqasynyń úzdigi. Osy básekede jeńiske jetken boksshy absolıýtti álem chempıony atanady.
Boksshylardy jaqynyraq tanystyra ketsek, Krıstına Hammer Qaraǵandy oblysynyń týmasy. Bul kúnderi Dortmýndta turyp jatqan ol 2009 jyldan beri kásipqoı rıngte baq synaýda. Sol kezden beri 28 jastaǵy Hammer 24 kezdesý ótkizip, 23 ret jeńiske jetti. 10 qarsylasyn nokaýtpen utty. Taǵy bir básekeniń nátıjesi esepke alynǵan joq.
Al 23 jastaǵy Klarresa Shılds áýesqoılar arasynda Olımpııa oıyndary men álem chempıonattaryn eki retten utty. Kásipqoı rıngte baq synap júrgenine eki jylǵa jýyqtap qaldy. Sol aralyqta 6 ret sharshy alańǵa kóterilip, barlyq básekeni óz paıdasynan sheshti. Eki qarsylasyn esinen tandyrdy.
Ǵalym SÚLEIMEN,
«Egemen Qazaqstan»
