Qazaqtan shyqqan tuńǵysh ınjener M.Tynyshbaev temir jol qurylysyn salý kezinde Túlkibas jerinde T.Rysqulovpen kezdesken. Derekterge júginsek, Muhamedjan Tynyshbaev 1926 jyldan bastap Turar Rysqulovtyń qoldaýymen Túrkistan-Sibir jolyn salýǵa qatysady. Temirjolshy retinde ol bul jobaǵa tájirıbeli ınjener jáne jergilikti jerdiń oı-shuńqyryn, erekshelikterin jaqsy biletin maman retinde tartylǵan.
Qos tulǵaǵa demeýshiler kómegimen eskertkish ornatylyp, qurmet kórsetildi, búgingi urpaq osylaısha óz asylyn baǵalaıtynyn bildirdi. Alash perzenti Turar Rysqulovtyń Túrkistan-Sibir temir jolyn saldyrýdaǵy eńbegi eren.
Eskertkishtiń ashylý saltanatynda Dúnıejúzi qazaqtary qaýymdastyǵy tóraǵasynyń birinshi orynbasary Zaýytbek Turysbekov, Túrkistan oblysy ardagerler keńesiniń tóraǵasy Jeńisbek Máýlenqulov, Orta Azııadaǵy mańyzy zor temir jol — TúrkSibti salýǵa qatysqan qazaqtyń alǵashqy ınjener-temirjolshysy M.Tynyshbaev atyndaǵy qoǵamdyq qordyń tóraıymy Nursháken Júnisova sóz sóılep, aýdanda atqarylǵan ıgi istiń mańyzy men búgingi urpaqqa berer tárbıelik mánine toqtaldy.
Sondaı-aq, aýdannyń 90 jyldyq mereıtoıyna kelgen qonaqtar el múddesin janqııarlyqpen qorǵaǵan alyp tulǵany qurmetteı otyryp, aýdan ortalyǵynda jańadan qoıylǵan Turar Rysqulovtyń eskertkishine taǵzym etti. Kópshilik alystan at arytyp, táý ete keletin jer, aýdandyq bıýdjetten 41 mln teńge bólinip, jańartylǵan «Túrkibasy áýlıe» kesenesimen tanysty.
Ǵalymjan ELShIBAI,
«Egemen Qazaqstan»
Túrkistan oblysy
