Saltanatty is-sharada maqta qabyldaý beketine eń birinshi bolyp kelgen Maqtaaral aýdanyna qarasty Iirjar aýyldyq okrýginiń turǵyny Qaırat Mamaqulov 9 tonna aq altyn ótkizdi. Bekettiń jumysyn baqylap, birneshe tarazdy arnaıy salystyryp teksergen aýdan ákimderi ólshem quralynyń ádildigine kóz jetkizdi. Osylaısha maqta terý maýsymy resmı túrde ashyq dep jarııalandy.
Jalpy Maqtaaral aýdanynda 38 593 gektardan asa jerge maqta shıti sebilgen. Bıyl ortasha eseppen gektarynan 21-24 sentnerden ónim alý kózdelip otyr. Búginde aýdandaǵy maqta qabyldaý beketterine 10 myń tonnadan astam aq altyn kelip túsken bolsa, dıqandar terim bitkenshe 80 myń tonna aq ulpa jınap alýdy kózdep otyr. Ol úshin 251 terimshiler brıgadasy, 40-tan asa kombaın maqta terý naýqanyna jumyldyrylǵan.
Maqtanyń tezirek ashylýy úshin aýdanda qazirdiń ózinde 31 myń gektardan astam maqtalyq alqapqa defolasııa sharalary jasalǵan. «Drob plıýs», «Avgýron ekstra», «Kotton», «Reglon-sýper» hımıkattarynyń maqta japyraǵyn túsirýdge tıimdi áseri baıqalýda.
«Kósekterge kún jaqsy tıgen soń tezirek ashylyp jatyr. Kóptegen sharýalar defolıasııanyń paıdasyn bilmeıdi. «Maqta salmaq joǵaltady» dep ony jasaýdan qashady. Kók kósekter kúzde úsik shalǵanda bir-aq ashylady. Ondaı maqtanyń sapasy da bolmaıdy» - dedi maqtasyn jınap jatqan sharýanyń biri Meıirbek Zabynbekov.
Aýdanda maqta óndiretin 5 zaýyt jáne maqta qabyldaıtyn 69 beket qyzmet kórsetýde. Zaýyttardyń ishinde TMD-da teńdesi joq sanalatyn «Myrzakent» maqta óńdeý zaýyty 120 adamdy turaqty jumys ornymen qamtyp otyr. Jalpy quny 1 mıllıard teńgeni quraıtyn óndiris oshaǵynyń joǵary tehnologııalyq qural-jabdyqtary AQSh-tyń «Lıýmýs Korporaıshn» kompanııasynan satyp alynyp, montajdalǵan.
О́ndiristik qýattylyǵy 60 myń tonnany quraıdy. Qoldanystaǵy maqta zaýyttarymen salystyrǵanda bul óndiristiń eńbek ónimdiligi 30 paıyzǵa joǵary. Atap aıtqanda, talshyqtyń shyǵýy 30 paıyzǵa artyq ári sapasy joǵary, elektr qýatynyń shyǵyny 25-30 paıyzǵa únemdeledi jáne maqtany óńdeý merzimi 30 paıyzǵa qysqarǵan.
Zaýyt mamandarynyń aıtýynsha, bıyl maqtanyń túsimi, talshyǵynyń uzyndyǵy, shıtiniń sapasy oıdaǵydaı. Biraq zerthana tekserýi kezinde maqtanyń lastyǵy mólsherden kóbeıip ketýde. Sebebi, terimshiler qaýashaq, kók japyraq, shóp-shalamdy aralastyryp teredi. Sol úshin zaýyt basshylary maqtashylardy taza ónim jınaýǵa shaqyrýda.
