Ras, mundaı sharalardyń balamasy Belarýs elinde de bar, túrli aqparattyq forýmdar ótkizilip turady. Biraq ár eldiń óz ustanymy bar ekenin eskersek, bul forýmnan kúterim kóp ekenin jasyrmaımyn. Meniń bul forýmǵa kelgendegi negizgi maqsattarymnyń biri – qazaqstandyq medıa naryqtaǵy jańa tehnologııalar men úrdisterdi kórý, úırený. Sonymen birge osy kúnge deıin ózara yntymaqtastyq turǵysynda jasalǵan Qazaqstan-Belarýs buqaralyq aqparat salasyndaǵy qarym-qatynasty tereńdete túsý. Sońǵy jyldary eki elde de BAQ salasyndaǵy zańnama ýaqyt talabyna saı jetildirile túskeni belgili. Bul jalpy jýrnalıstıka paradıgmasynyń ózgerisine de qatysty.
Medıa aptalyq sheńberinde biz áriptesterimizben televızııa salasy men normatıvtik-quqyqtyq baza boıynsha ortaq júzege asyryp jatqan ıdeıalarymyzdy pysyqtadyq. Osy oraıda forým aıasynda ózim qyzyqqan keıbir medıa elementterge toqtala ketkim keledi. Máselen, keshe jabyq pıtchıngke qatystym. Bul sharany televızııadaǵy ıdeıalar jármeńkesi desek te bolady. Pıtchıngti medıa forýmda qoldaný men úshin jańalyq boldy, qatty unady, keleshekte ony elimizde qoldanysqa engizgim keledi. Pıtchıng Belarýs medıa forýmdarynda qoldanysta joq. Sonymen qatar Qazaqstannyń medıa ındýstrııasynda qoldanylyp júrgen jańa tehnologııalar, júıeler, tehnıkalar, jańa jabdyqtar barlyǵy qyzyǵýshylyǵymyzdy arttyrýda desem, artyq aıtpas edim.
Jalpy, Qazaqstanda medıa salasyn sıfrlandyrý, jańa tehnıkalyq jabdyqtarmen qamtamasyz etý joǵary deńgeıde. Ortaq máselelerimiz de joq emes. Belarýs elinde de kóptegen postkeńestik elderdegi sııaqty sıfrlandyrý máselesi, dástúrli BAQ-ty saqtap qalý, baılanysty damytý ótkir kúıinde tur. Biraq Qazaqstan osy turǵydan aýqymdy jobalardy tyńnan júzege asyryp, taza ıdeıa júzinde qalmaı, qaryshtap damý jolynda. Sol sebepti Qazaqstan medıa salasyndaǵy árbir úrdis biz úshin úlken tájirıbe bolmaq.
Osydan bir aı buryn Belarýs Aqparat mınıstrliginiń bastamasymen quramynda medıa salasynyń kóptegen mamandary bar bir top delegasııa «Qazmedıa» ortalyǵynyń qyzmetimen arnaıy kelip tanystyq. Ortalyqtyń nıýsrýmdary men stýdııalaryna ekskýrsııa jasadyq, tehnıka túrlerin kórdik. О́kinishke qaraı, elimizde mundaı iri aqparattyq ortalyq joq. «Qazmedıa» sekildi kóptegen BAQ túrin bir shańyraq astynda jınaý týraly ıdeıa biz úshin tyń emes, degenmen ony qalaı júzege asyramyz, durys jolmen kele jatyrmyz ba degen suraqqa jaýap izdeı kelgenimiz shyndyq. Mundaı ortalyq ekonomıkalyq turǵyda tıimdi, sondaı-aq telehabar taratýda ortaq arhıvtik baza bolýymen qundy. Sizder úshin mundaı obektini salý ótken tarıh bolsa, biz úshin úlken tájirıbe. Ortalyqty salý kerektigi, onyń tıimdiligi aıqyndaldy, endigi jerde másele qarajatqa baılanysty bolmaq.
Sıfrlandyrý – álemdi qamtyǵan megatrend. Jer sharynyń bir bóliginde oryn alyp jatqan jańalyq, ekinshi bóligine erte me, kesh pe jetetini aıqyn. Osy oraıda biz aýdıtorııamyzdyń baǵyty men suranysy qyzmetine nazar aýdarýǵa májbúrmiz. Men qatysqan О́ńirlik BAQ forýmynda osy máseleler óte oryndy kóterildi. Jalpy, medıa aptalyqtyń alǵashqy eki kúninen alǵan áserim men jańalyǵym mol ekenin aıtqym keledi.
Pavel LEGKII,
Belarýs Aqparat mınıstriniń birinshi orynbasary
