Forýmǵa Qazaqstan Premer-Mınıstri Baqytjan Saǵyntaev, DSU bas dırektory Robertý Azevedý, sondaı-aq, 40 DSU-ǵa múshe eldiń jáne DSU baqylaýshy elderiniń mınıstrleri men delegasııa basshylarynan turatyn álemdik deńgeıdegi (TMD, Azııa, Shyǵys Eýropa jáne Taıaý Shyǵys elderi) sarapshylar qatysty. 26–27 qyrkúıek kúnderi Astanada Dúnıejúzilik saýda uıymyna kirý jónindegi jetinshi «dóńgelek ústel» ótti.
Ashylý rásiminde QR Premer-Mınıstri Baqytjan Saǵyntaev sóz sóıledi.
Forým jumysy tórt taqyryptyq seksııa boıynsha ótkiziledi. Birinshi seksııa ekonomıkanyń turaqty damýy, básekege qabilettiligi, ósimi jáne ony ártaraptandyrý maqsatynda saýda-sattyq pen ınvestısııalardy ulǵaıtýǵa qoldaý kórsetý máselelerine arnalǵan. Ekinshi baǵyt — bıznestiń ınvestısııalardy qoldaý salasyndaǵy kúrdeli máselelerdi sheshý jónindegi pikirleri. Úshinshi seksııa barysynda ınvestısııalar men ınnovasııalardy qoldaý salasynda tájirıbemen almasý josparlanǵan. Sonymen qatar, ishki jáne aımaqtyq deńgeılerdegi tabysty oqıǵalar men máseleler talqylanbaq. Tórtinshi sessııa jumysy «Damý maqsatynda ınvestısııalardy qoldaý úshin kópjaqty yntymaqtastyqqa qatysý» taqyryby boıynsha ótedi.
Pikirtalastar barysynda atalǵan taqyryptardyń túrli aspektilerine sáıkes jan-jaqty ári syndarly pikir almasýlar ótedi. Shara qorytyndysy boıynsha «Astana málimdemesi» qaralyp, qabyldanady.
Forým DSU múshelerin Qazaqstannyń ınvestısııalar tartý salasyndaǵy tabysty tájirıbesimen jáne ınvestısııalyq múmkindikterimen tanystyrady, elimizdegi ınvestısııalyq qyzmetti keńeıtýge jol ashyp, DSU-ǵa múshe memleketterdiń kópjaqty qarym-qatynasyn odan ári damytýǵa jańa serpin bermek.
Qazaqstan Dúnıejúzilik uıymǵa 2015 jyly kirdi. 2015 jyldyń 22 maýsymynda RG-nyń XX formaldy kezdesýinde Qazaqstannyń Dúnıejúzilik saýda uıymyna kirý sharty kórsetilgen qujat qabyldanǵan bolatyn. 2015 jyldyń 27 shildesinde Dúnıejúzilik saýda uıymynyń Bas keńesiniń kezekti otyrysynda Prezıdent N. Nazarbaevtyń qatysýymen Qazaqstannyń DSU-ǵa kirýi týraly Hattamaǵa qol qoıý rásimi ótti.
Qazaqstan 2015 jylǵy 30 qarashada QR Parlamentiniń mindettemeler paketin ratıfıkasııalaý gramotasyna qol qoıý jáne ony 2015 jyldyń 1 qarashasynda DSU Hatshylyǵyna tapsyrǵannan keıin Dúnıejúzilik saýda uıymynyń tolyqqandy múshesi boldy.
2017 jylǵy 7 sáýirde Qazaqstan Respýblıkasy Saýda jáne qorshaǵan orta jónindegi DSU Komıtetiniń Tóraǵasy bolyp saılandy. О́tken jyldyń sáýir aıynda Qazaqstan «Damý maqsatynda ınvestısııalardy qoldaý dostary» tobyna, maýsym aıynda «Damý maqsatynda elektrondyq kommersııa dostary» tobyna qosyldy. DSU-ǵa múshe retinde Qazaqstan Dúnıejúzilik saýda uıymy men Azııa óńirlik damýshy tobyn qurý týraly XII kelisimniń babyna sáıkes, Uıym músheleriniń kelissózder tobyna kirdi. 2018 jylǵy 7 naýryzda DSU-nyń Bas keńesiniń kezekti otyrysynda Qazaqstan DSU Qyzmet saýdasy jónindegi arnaıy sessııasynyń tóraǵasy bolyp saılandy. 2018 jyly 29 mamyrda Qazaqstan 2020 jyly DSU-ǵa múshe elder mınıstrleriniń kezekti konferensııasyn Astanada ótkizýdi usyndy. DSU-nyń Bas keńesi otyrysynda Uıymǵa múshe elder biraýyzdan 2020 jyldyń maýsymynda DSU-nyń 12-shi Mınıstrler konferensııasynyń Qazaqstanda ótkizilýin qoldap biraýyzdan daýys berdi.
DSU-nyń XII Mınıstrler konferensııasy jumysyna 164 múshe-elderden jáne Dúnıejúzilik saýda uıymynyń 20 baqylaýshy elderiniń saýda mınıstrleri qatysady. Qatysýshylardyń jalpy sany 4-4,5 myń adam bolady.
Mınıstrler konferensııasy — eki jylda bir ret ótetin DSU-nyń joǵary basqarýshy organy. Mınıstrler Konferensııasynyń quzyreti joǵary, onyń ishinde halyqaralyq saýdany retteıtin jańa quraldardy bekitý týraly sheshim de qabyldaıdy.
Qazirgi ýaqytta Qazaqstanda bıznes ortany jaqsartý jumysy satylaı júzege asyp keledi. Kásipti bastaýǵa qajetti qujattar tizimi azaıyp, olardy alý joly da jeńildedi.
2016 jyldan bastap elimizdiń barlyq 16 aımaǵynda ınvestorlarǵa qyzmet kórsetý úshin «Bir tereze» qaǵıdasymen jergilikti keńseler ashyldy.
Investorlar men Úkimettiń dıalogtyq alańy bolý úshin 20 jyl boıy Qazaqstan Respýblıkasy Prezıdentiniń janyndaǵy Sheteldik ınvestorlar keńesi, Premer-Mınıstr janyndaǵy ınvestısııalyq ahýaldy jaqsartý jónindegi keńes, ınvestısııalyq jáne bıznes ombýdsmen ınstıtýttary jumys istep keledi.
Dúnıejúzilik banktiń bıznes júrgizý jeńildigi boıynsha jasaǵan reıtıngisinde Qazaqstan Respýblıkasy 35-shi orynda tur. Ortalyq Azııada — ınvestısııalyq ahýaly jaıly el retinde I orynda. Qazaqstan ekonomıkasy shetel kapıtaly úshin tartymdy, memleket $260 astam sheteldik ınvestısııa tartqan.
