Mereke qarsańynda M. О́temisov atyndaǵy Oqýshylar saraıynda pedagogtarǵa qurmet kórsetý saltanaty bolyp ótti. Ǵımarattyń zalyna astanalyq bilim uıymdarynyń, qalalyq bilim berý mekemeleriniń jetekshileri men qoǵamdyq uıymdardyń ókilderi jınaldy. 100-den astam astanalyq pedagog erekshe ataldy. Olardy QR Bilim jáne ǵylym mınıstrliginiń jáne Astana qalalyq bilim basqarmasynyń qurmet gramotasymen, alǵys hattarmen marapattady.
«Bizdiń astanamyzdyń damýy, álemdik arenada ózin eń jas ári ilgeri qala ekendigin málimdedi, onyń kóbisi sizderdiń de eńbekterińizben baılanysty. Búginde bári astanaǵa qaraı aǵylady, sebebi balalaryna sapaly bilim bergisi keledi, olar izdegenin osy jerden tabatynyna senimdi, al oǵan sizderdiń qosqan úlesterińiz sózsiz. Sizderge alǵys aıta otyryp, kele jatqan merekemen quttyqtaǵym keledi. Bizdiń aldymyzda úlken mindetter tur, úlken jetistikterge jetýden qoryqpaıyq, tek jaqsylyqqa umtylaıyq», - dedi astanalyq bilim basqarmasynyń basshysy Ánýar Janǵozın ustazdardy quttyqtap.
Úzdik pedagogtardyń esimderi qala men eldiń tarıhynda qalady, olar «Bilim júıesiniń Altyn qoryna» engiziledi.
«Ár adamnyń ómirinde 11 jyl bilim berip tárbıelegen ustazy erekshe oryn alady. Bul jarqyn mereke bylaısha barlyǵynyń da qýanyshy. Pedagogtar kún saıyn óziniń eńbegimen astanany damytýǵa úles qosyp qana qoımaı, Qazaqstandy da alǵa damyta túsedi», - dedi № 15 mektep-lıseıiniń qazaq tili men ádebıeti pániniń oqytýshysy Raýan Ásemova.
Sondaı-aq keshte «Dıdarly jaz», «Biz Qazaqstannyń bolashaǵymyz» qalalyq jarysynyń fınaldyq jeńimpazdary belgili boldy. Qatysýshylarǵa baǵaly syılyqtar men kýboktar tapsyryldy. Ustazdar merekesi konserttik baǵdarlamamen jalǵasty. Kásibı pedagogtardy merekesimen Qazaq ulttyq horeografııa akademııasy, «Vaınah» bı ansambli, «Qurmet» ordeniniń ıegeri, tanymal ánshi Tamara Asar jáne basqalar quttyqtady.
