Eki jyldan beri baspanasy joq, qańǵyryp júrgen jandardy jınap, olardyń qujattaryn qalpyna keltirip, qoǵamǵa paıdaly azamat retinde qaıta qosylýyna kóp kúsh-jigerlerin salyp júr. Gıldermannyń otbasy - ınternasıonaldy. Joldasy Baı-Elı Saıdsolımovıchtiń ulty - sheshen, ózi nemis qyzy. Ekeýiniń de áke-sheshesi 1957 jyly Qazaqstanǵa qonys aýdarylypty. Osy jerde úshinshi urpaqtary dúnıege kelgendikten, Qazaqstandy otanymyz dep qurmet tutady», - deıdi Rıdder qalalyq ishki saıasat bóliminiń basshysy Anar Oralqyzy.
Galına Gılderman jaqynda Rıdderde «Rýhanı jańǵyrý» baǵdarlamasynyń aıasynda ótken «Jomart júrek» qaıyrymdylyq forýmynda «Jyl tulǵasy» nomınasııasy boıynsha marapattalypty. Júregi jomart kásipker jyl basynan beri qaladaǵy qaıyrymdylyq sharalaryna úsh mıllıon teńgeden astam qarjysyn jumsapty. О́ziniń «Rıabınýshka» degen dámhanasynda múgedek jandar men jalǵyzilikti zeınetkerlerge, uzyn sany 57 adamǵa kún saıyn bir mezgil tegin ystyq tamaq berýdi dástúrge aınaldyrǵan eken. Osyndaǵy jetim balalarǵa arnalǵan arnaıy korreksııalyq mektep-ınternattyń tárbıelenýshilerine de únemi járdemdesip turady. Júıke aýrýlary dıspanserinde jatqan 41 muńlyqqa da Galına Mıhaılovnanyń júregi aýyrady. «Olardyń barlyǵyn týystary umytyp ketken, eshkimge kerekteri joq. Máńgilik mekenine osy jerden attanatyndary da kezdesedi. Jarymkóńil jandardy bir ýaqyt qýantý úshin merekelik is-sharalar uıymdastyramyz. Endi bir teledıdar syılaıyq dep júrmiz», - deıdi ol.
Kásipkerdiń shańyraǵy ártúrli sebeptermen qıyn jaǵdaıǵa tap bolyp, úı-kúısiz qalǵan jandardyń da qutty mekenine aınalǵan. Olar qujattaryn jóndegenshe óz úıinde turǵyzyp, ishkilikke salynǵandary bolsa, óz qarajatyna emdetip, turaqty jumys tapqansha bas-kóz bolýdan esh arlanǵan emes. «Úsh balamyz bar. Úlkenimiz de qaıyrymdylyq sharalarynan qalyspaıdy. Otbasymnyń qoldaýynyń arqasynda ártúrli kómekke muqtaj adamdarǵa járdemdesip kelemiz. Múmkindik bolsa, álsizge kómektesip, burys jolǵa tússe, durys jolǵa qaıta túsýine baǵyt-baǵdar berý sanaly adamnyń paryzy dep oılaımyn», - deıdi Galına Gılderman.
Reti kelgende aıta keteıik, Rıdder qalasynda sońǵy eki jylda 70-ten astam ártúrli qaıyrymdylyq sharalary uıymdastyrylyp, qoly ashyq jandardyń qoldaýymen 100 mıllıon teńgeden astam qarajattyń áleýmettik kómegi kórsetilipti. «Jomart júrek» qaıyrymdylyq forýmynda Atymtaı jomart azamattar «Eren eriktilik», «Jyl tulǵasy», «Jyldyń úzdik uıymy», «Týǵan ólkem», «Jyl mesenaty» atalymdary boıynsha marapattalypty. Sonymen qatar «Mektepke jol» qaıyrymdylyq aksııasyna úles qosqan jáne áleýmettik jobalardy júzege asyrǵan 22 kásipkerge «Nur Otan» partııasy Rıdder qalalyq fılıalynyń Alǵys haty tapsyrylypty. «Jyl mesenaty» nomınasııasynda turmysy nashar otbasylar men ata-analarynsyz qalǵan balalarǵa únemi qoldaý kórsetip kele jatqan, «Svıatoch» balalar úıiniń kommýnaldyq qyzmetterin tóleýge alty mıllıon teńgeden astam qarajat jumsaǵan «Kazsınk» JShS (Aleksandr Hmelev) ókili, «Eren eriktilik» atalymynda «Senim» resýrstyq ortalyǵynyń jetekshisi, jastardyń reprodýktıvti densaýlyǵyn saqtap, óńirde volonterlikti damytýǵa úles qosyp júrgen Nadejda Merkýleva, «Týǵan ólkem» atalymy boıynsha bilim mekemeleri men qoǵamdyq uıymdarǵa qoldaý kórsetý men qalany abattandyrý jumystaryna úsh mıllıon teńgeden astam qarjy jumsaǵan «Samid» JShS dırektory Atymkan Salımbaev, «Jyldyń úzdik uıymy» retinde «VostokSanTehStroı» JShS-iniń jetekshisi, jeke kásipker Bolathan Kúzembaevqa qurmet kórsetilipti. «Qaıyrymdylyq degenimiz bir jolǵy áleýmettik naýqan emes. Bul búgingi tańda árbir adam úshin qajettilik, qalypty jaǵdaı bolý kerek. Men rıdderlikter ata-babalarymyzdan kele jatqan osy jarqyn isterdi jalǵastyrady dep senemin», - deıdi Rıdder qalasy ákiminiń orynbasary Danııar Dúısembaev.
Azamat QASYM,
«Egemen Qazaqstan»
Shyǵys Qazaqstan oblysy,
Rıdder qalasy
