Sýrette: Ádilbek Túktibaev jubaıy Shárban, uly Qýandyqpen
Budan birneshe jyl buryn Besqaraǵaı aýdanynyń ortalyǵy Boǵasta issaparmen bolǵanymda Ádilbek Túktibaev degen azamatpen tanysqan edim. Ol kezde Ádekeń aýdandyq áleýmettik qamtý jáne baǵdarlama bólimi bastyǵy qyzmetin atqaratyn. Biraq sol joly rýhy myqty azamattyń ekinshi toptaǵy múgedek ekenin, taǵdyr taýqimetin tartsa da qıyndyqqa moıymaı, sportpen shuǵyldanǵanyn, ústel tennısinen oblys chempıony, birneshe ret respýblıkalyq, halyqaralyq jarystarda mereıi ústem bolǵanyn bilmegen edim. Maýsym aıynda atalmysh aýdanǵa taǵy barýdyń sáti túsken edi.
Aýdan ortalyǵy Boǵas sońǵy kezderi adam tanymastaı ózgerip ketipti. Kósheleri asfalttalǵan, aspa shamdary jarqyraǵan aýdan ortalyǵynyń kúnbatys jaǵyndaǵy ortalyq stadıon erekshe qulpyryp ketken. Jaqynda ǵana stadıonnyń janynan vorkaýt ashylypty. Aýyldyń kórikti jerindegi osy jerden dene shynyqtyrý jáne saýyqtyrý kesheni boı túzepti.
– Aýdanda 622 múmkindigi shekteýli jan bar. Olardyń kóbi bos ýaqytynda sportpen shuǵyldanady. Men uzaq jyldar sportty ózime serik etip kelemin. Otan aldyndaǵy boryshymdy Mońǵolııadaǵy áskerı-áýe kúshterinde atqarǵan edim. Áskerıler arasyndaǵy saıystarda san márte júldeger atandym. Amal bar ma, pále degen aıaq astynan eken, áskerı jattyǵý kezinde jaralanyp, bir aıaq, bir qolymdy mońǵol jerine tastap kettim. Uzaq jyldar aýdandyq áleýmettik qamtý jáne baǵdarlama bólimin basqardym. Qazir aýdandyq ishki saıasat bóliminde din jónindegi qyzmetti atqaryp júrmin, – dep Ádilbek Taqanuly Túktibaev biraz jaıdan maǵlumat bere ketti.
Ádekeńniń úıinde bolǵan kezde áńgimeniń tıegin aǵytyp, fotosýrettermen tanystyq. Ár jyldary jeńip alǵan kýboktary men gramotalary, oblys ákimi, oblystyq dene shynyqtyrý jáne sport basqarmasynan alǵan Alǵys hattary bir tóbe. Ádekeńniń otbasy da sport dese ishken asyn jerge qoıatyn kórinedi. Uly Qýandyq Ádilbekuly dzıýdodan jasóspirimder arasynda san márte júldeger atanypty. Bıyl 11 synypty aıaqtaǵan Qýandyq joǵary oqý ornynyń stýdenti. Jubaıy Shárban Sabyrhanqyzy men qyzy Botagóz de bos ýaqyttaryn mándi ótkizýge nazar aýdarady.
– Sport – meniń jan serigim. Ústel tennısinen ótken jarystarda oblys namysyn abyroımen qorǵap kelemin. Pavlodar, Shymkent, Qostanaı qalalarynda múmkindigi shekteýli jandar arasynda ótken respýblıkalyq birinshilikterde júlde terdim. Pavlodarda ótken paralımpıadalyq oıyndarda qola medaldy ıelendim. Aýdanda 622 múmkindigi shekteýli jan bar dep joǵaryda aıtqan edim. Sonyń biri Aleksandr Mırkov bıyl jeńil atletıkadan ótken oblystyq, aýdandyq jarysta úsh ret júldeger atandy. Aýdanda múgedekter qoǵamyn ashatyn ýaqyt jetti dep esepteımin. Eger ony ashsaq, sportpen shuǵyldanatyndar qatary ósetini sózsiz. Qazirdiń ózinde shahmat, doıby, sporttyń basqa túri damı túser edi. Jalpy alǵanda aýdan ákimi Dáýlet Batyrbaev bizge qamqorlyq jasap keledi. Bıyl tabıǵaty tamyljyǵan ný orman ishinde «Elimaı» balalar lagerin ashyp, eki júzden astam bala sport jarystaryna qatysty. Sporttyń basqa túrlerinen, atap aıtqanda, at sporty, qazaq kúresi de kúrt damyp keledi, – deıdi Ádilbek Taqanuly.
Rýhy synbaǵan, sportty ózine serik etken Ádekeń basqa azamattar da úlgi!
Ońdasyn ELÝBAI,
Shyǵys Qazaqstan oblysy,
Besqaraǵaı aýdany
