Qurmanǵazy aýdanyna issaparmen kelgen Parlament Senatynyń depýtaty Sársenbaı Eńsegenov aqjoltaı jańalyq jetkizdi. Magıstraldyń 60 shaqyrymynyń qurylysy bastalypty.
Negizi jumys ótken jyly bastalady dep josparlanǵan bolatyn.
«Jol qurylysyna 373 mln AQSh dollary qajet boldy, onyń 45 mln-y respýblıkalyq bıýdjetten bólinýi kerek edi. Qalǵan bóligi Islam Damý Bankiniń qarjysy. Tıisti qujattar tolyq daıyn bolǵanymen, 2017 jyly kelisimshartqa qol qoıylmady, sondyqtan respýblıkalyq bıýdjetten qaralǵan qarjy ıgerilmeıtin bolǵasyn keıin qaıtaryldy», – deıdi senator. Aqyry Parlamentke kelisimshart túspegen soń, Sársenbaı Eńsegenov Úkimet basshysynyń birinshi orynbasary A.Mamınge osy problemanyń sheshimin tappaı otyrǵanyn aıtyp, depýtattyq saýal joldaǵan. Máseleni Senat tóraǵasy Qasym-Jomart Toqaev qoldap, nátıjesinde arnaıy jol kartasy jasaldy. «Qazavtojol» AQ jarııalaǵan konkýrstyń jeńimpazy bolyp «Sıne Mıdas Stroı» BK» JShS men «Todını» AQ quramyndaǵy konsorsıým anyqtalǵan.
Qurylys bastalǵan Kotıaev aýyly Reseımen ortadaǵy shekarada ornalasqan. «Nurly jol» memlekettik baǵdarlamasy aıasynda júzege asatyn joba boıynsha 60 shaqyrym jol salynady. 500-den astam adam jumyspen qamtylady. Qurylys barysymen tanysýǵa kelgen Investısııalar jáne damý mınıstrligi Avtomobıl joldary komıteti tóraǵasynyń orynbasary Sátjan Ábilálıevtiń aıtýynsha, Atyraý-Astrahan jolynyń 217 shaqyrymyna Eýropa qaıta qurý jáne damý banki 160 mln AQSh dollaryn bólýge kelisim beripti. Kúre jol qurylysyna qazirgi zamanǵy úzdik tehnologııa paıdalanylady. Eni 9 metr, bir beldikke túsetin júk salmaǵy 13 tonnadan asady, bul aýyr kólikterdiń qozǵalysyna da kedergi týdyrmaıdy.
«Qazavtojol» UK» AQ basqarma tóraǵasynyń orynbasary Temirhan Meńdiǵalıev qurylys kezinde 12 kópir qaıta jóndelip, 55 sý ótkizgish qubyr qarastyrylatynyn aıtady. Jol tolyqtaı jańartylǵanda Atyraý arqyly Orta Azııadan keletin kólikter 300 shaqyrymdy únemdeıdi. Alys joldyń azabyn tartatyndarǵa bul kóp jeńildik.
Baqytgúl BABASh,
«Egemen Qazaqstan»
ATYRAÝ
