Túrkistan oblysynyń bolashaǵyna senimi nyq memlekettik qyzmettegilerdiń jumys tártibi qajetti qalypqa túsip, óz mindetterin oryndaýda. Solardyń qatarynda Túrkistan oblysy boıynsha sottar ákimshisi, Túrkistan oblystyq soty jáne mamandandyrylǵan sottar da bar. Qazirgi tańda sot júıesi ǵımaratpen jáne qyzmetkerleri turǵyn jaımen tolyq qamtamasyz etilgen.
Oblystyq sot júıesiniń 33 sýdıasy, 128 sot qyzmetkeri jáne kelisimshart negizinde jumys istep júrgen 15 azamat Shymkentten Túrkistanǵa, Kentaýǵa qonys aýdardy. Jumystyń sapasyn joǵaltpas úshin kóshti utymdy uıymdastyryp, sýdıalar men sot qyzmetkerlerin baspanamen qamtamasyz etý de mańyzdy másele. Osy mańyzdy máseleni birigip sheshý úshin Túrkistan oblysy boıynsha Sottar ákimshisi men oblys ákimdiginiń, sondaı-aq Túrkistan, Kentaý qalalary ákimdikteriniń arasynda ózara yntymaqtastyq týraly memorandýmǵa qol qoıylǵan bolatyn.
Memorandýmǵa sáıkes, taraptar Túrkistan oblysy sot júıesiniń jańa ortalyqqa kóshýine, ornalastyrylýyna qatysty is-sharalardy júzege asyrýda ózara yqpaldastyqta jumys atqara bastady. Árıne sotqa kelýshilerge barynsha qolaıly jaǵdaı jasalýy úshin qajetti ǵımarat zamanaýı talaptarǵa saı kelýi tıis. Sot zaldaryn aýdıo-beınetirkeý jáne beınebaılanys júıelerimen jabdyqtaýdan bólek, ǵımaratta kútý zaly, prokýrorlar men advokattarǵa arnalǵan kabınetter, keńesý bólmeleri, medıasııa jáne muraǵat, istermen tanysýǵa arnalǵan keńseler bolýy da shart. Osyndaı talaptarǵa saı ǵımarattardy tańdaý barysynda Joǵarǵy Sot janyndaǵy Sottardyń qyzmetin qamtamasyz etý departamentiniń basshysy Nurserik Sháripov Túrkistanǵa arnaıy kelgen. N.Sháripov arnaıy saparynyń barysynda jalǵa beriletin nysandardy aralap, ıelerimen kezdesti jáne ǵımarattardy anyqtap berdi. Osynyń nátıjesinde, tańdalynyp alynǵan ǵımarattar qysqa merzimde zaman talabyna sáıkestendirilgen bolatyn.
Oblys ákimdigi Túrkistan qalasynda ornalasqan sońǵy úlgidegi jataqhanalardyń birinen birqatar sýdıalarǵa jáne barlyq sot qyzmetkerlerine tegin turatyn turǵylyqty jaı bóldi. Keıbir sot mamandary Kentaý qalasyndaǵy bıyl kúrdeli jóndeýden ótkizilgen jataqhanada turǵyn jaımen qamtamasyz etildi. Túrkistan men Kentaý qalasy arasyndaǵy jolda júrý máselesi de óz sheshimin tapty, ıaǵnı Kentaý qalasynyń ákimdigi tarapynan arnaıy bólingen avtobýs sot qyzmetkerlerin jataqhanadan jumys ornyna jáne keri tegin tasymaldaýda. Oblys jáne Túrkistan, Kentaý qalalarynyń ákimderine kórsetip otyrǵan qoldaýlary úshin úlken alǵys bildiremiz», deıdi Túrkistan oblysy boıynsha Sottar ákimshisi Orynbasar Leshtaev.
Iá, kóshke kómektesken saýapty is bolyp sanalady. Kópshilik jaıǵasyp, jaılanyp alǵan sot qyzmetkerleri óz mindetterin jańa ortalyqta sapaly da minsiz atqarady degen úmitte.
Ǵalymjan ELShIBAI,
«Egemen Qazaqstan»
Túrkistan oblysy
