Qazaqstannyń Bas memlekettik sanıtarııalyq dárigeri Jandarbek Bekshınniń tóraǵalyǵymen óńirlerdiń aldaǵy tumaý men JRVI-dyń epıdemııalyq maýsymyna daıyndyǵy, sondaı-aq 2018-2019 jylǵy epıdmaýsymda syrqattanýdy azaıtýǵa baǵyttalǵan is-sharalar týraly selektorlyq keńes ótti. Keńeste elimizdegi emdeý uıymdarynyń tumaýǵa qarsy vaksınasııalaýǵa, tumaýmen jáne JRVI-men aýyratyn naýqastarǵa bastapqy medısınalyq-sanıtarııalyq, stasıonarlyq kómek kórsetýge daıyndyǵy máselesi sondaı-aq halyq arasynda olardyń aldyn alý boıynsha qabyldanyp jatqan sharalar qaraldy. Odan bólek vırýsologııalyq zerthanalardyń tumaý men basqa da JRVI-ǵa zertteý júrgizýge daıyndyǵy talqylandy.
«Biz táýekel tobyn vaksınamen qamtamasyz etýdegi jumystardyń jetkiliksizdigine alańdap otyrmyz. Bul birinshi kezekte Qostanaı oblysy men Astana qalasyna qatysty», dedi Jandarbek Bekshın.
Onyń aıtýynsha, barlyq medısınalyq mekemeler epıdemııalyq maýsymǵa daıyn. Táýekel tobynyń adamdaryn tumaýǵa qarsy vaksınasııalaýmen qamtý úshin bıýdjettik qarajatqa «Grıppol +» reseılik vaksına satyp alynǵan. Onyń quramynda A(H1N1), A(H3N2) tumaýyna jáne V tıpti tumaýǵa qarsy shtamdar antıgenderi bar. Táýekel tobyna medısınalyq baqylaýǵa jatatyn, jıi aýyratyn balalar, sábıler, balalar úıiniń jasóspirimder, múgedekter men qarttar úıleriniń kontıngenti, sozylmaly jáne júrek-qan tamyry, tynys alý aǵzalarynyń aýrýlarymen aýyratyn adamdar, medısına qyzmetkerleri men júkti áıelder jatady. Bular aýrýǵa beıim toptar bolyp sanalady. Respýblıka boıynsha tumaýǵa qarsy vaksınasııalaýdy júrgizý úshin 3428 egý pýnkti uıymdastyrylǵan, olar qajetti jabdyqpen qamtamasyz etilgen.
«Astanada vırýsqa qarsy vaksına máselesi turaqtalyp keledi. Qazirgi ýaqytta elordaǵa 30 myń vaksına jetkizilse, taǵy 50 myńy ákelinetin bolady. Degenmen, qajettilik týyndaǵan jaǵdaıda olar jumys berýshiler tarapynan da, densaýlyq saqtaý basqarmasy tarapynan da satyp alynady dep oılaımyz. Al Qostanaı oblysyna 100 myń vaksına kerek bolsa, qazirgi ýaqytta sonyń 57 myń dozasy satyp alynǵan. Qalǵanyn satyp alýdy ótinemiz», dedi J.Bekshın.
Medısınalyq kómekti ýaqtyly kórsetý maqsatynda shaqyrtýlar men konsýltasııalar úshin medısınalyq uıymdarda 1226 telefon bólingen, úıge shaqyrtýǵa qyzmet kórsetý úshin 1025 birlik avtokólik bólingen, al JRVI men tumaýmen aýyrǵan aýyr naýqastardy emdeýge jatqyzý úshin rezervtik 5000 tósek qory qarastyrylǵan.
Sonymen birge respýblıkanyń medısınalyq uıymdarynda mamandandyrylǵan kómekti kórsetý úshin tumaýǵa qarsy preparattar qory qurylǵan. Qazir Qazaqstanda 50 000 qaptama Tamıflıý jáne 10 000 «Relenza» preparatynyń qory bar. Stasıonarlar qarqyndy emdeý úshin qajetti jabdyqpen jáne quraldarmen qamtamasyz etilgen. Dárihanalarda vırýsqa qarsy preparattar men bir ret qoldanylatyn betperdelerdiń jetkilikti qory bar. Osyǵan deıingi júrgizilgen aqparattyq túsindirý jumystarynyń nátıjesinde aǵymdaǵy jyly Qazaqstanda vaksınasııadan bas tartatyndardyń arasynda vaksınasııa jónindegi óz pikirlerin ózgertken adamdardyń kúrt ósý úrdisi baıqalady. Bıyl 8 aıda olardyń 2220-sy ekpe alǵan, al 2016 jyly tek 250 adam ǵana egilgen bolatyn.
Maıgúl SULTAN,
«Egemen Qazaqstan»
