О́tken jylǵa qaraǵanda sýdyń qurbany bolǵandar sany 12 prosentke azaıǵan. Tótenshe jaǵdaılar departamentiniń Tótenshe jaǵdaılardy joıý bóliminiń bas mamany K.Táýekelov sýǵa túsý maýsymy kezinde ajal qushatyndardyń sebebin jáne baqytsyz jaǵdaılardyń aldyn alý úshin júrgizilgen profılaktıkalyq saqtyq sharalary jóninde aıtty.
«Byltyrǵyǵa qaraǵanda abaısyzdyqtan ajal qushqandardyń sany azaıdy. Ol jaz aılarynda belsendi júrgizilgen saqtyq sharalarynyń, jergilikti barlyq deńgeıdegi atqarý organdarymen, qoǵamdyq uıymdarmen birlese atqarǵan jumystardyń nátıjesi dep bilemiz. Jaǵajaılarda qutqarýshylardyń kezekshiligi uıymdastyryldy, shomylýǵa ruqsat etilmegen sý aıdyndary, jaǵajaılar anyqtaldy, olarda patrýl qoıdyq. Tobyl ózenine, Gagarın bógetine sýǵa súńgýirler kezekshilik jasady» deıdi azamattyq qoǵanys maıory Táýekelov.
Oblys óńirindegi sý aıdyndarynda sýǵa túsý maýsymy kezinde 16 qutqarý beketteri quryldy, jabdyqtalmaǵan sýǵa túsetin oryndarda 412 belgiler qoıyldy. «Qaýipsiz kanıkýl» aksııasy kezinde balalardyń demalys lagerlerinde olarmen 104 541 áńgime ótkizildi. Mektep janyndaǵy alańdarda 140 ashyq sabaqtar, konkýrster, fleshmobtar ótkizildi.
Shomylý maýsymy jabylǵanymen kúzgi balyq aýlaý maýsymynda da problema azaımaıdy. Bıyl sýda balyq aýlaǵan kezdegi erejelerdi saqtamaý saldarynan eki balyqshy sýǵa ketti.
Názıra JÁRIMBET,
«Egemen Qazaqstan»
Qostanaı
